Германы засгийн газар Германд гэмт хэрэг үйлдсэн афган цагаачдыг Афганистан руу албадан гаргах нислэгийг ойрын хугацаанд хийх төлөвлөгөөгүй гэж мэдэгджээ.

2021 онд Исламын талибуудын хатуу дэглэм тус улсын эрх мэдлийг гартаа авснаас хойш Герман улс хүмүүсийг албадан гаргасаар ирсэн. Афганистаны цагаач иргэн Германд халдлага хийсэн нь улс төрийн томоохон асуудал болсон. Германд орогнол хүсэн ирсэн 24 настай Афганистаны иргэн үйлдвэрчний эвлэлийн жагсаал руу машинтайгаа зориудаар дайрч, гучин хүнийг шархдуулсан байна. Германы засгийн газрын хэвлэлийн төлөөлөгч Штеффен Хебестрейт Афганистан руу цагаачдыг дахин албадан гаргахаар төлөвлөж байгаа ч одоогоор нислэгийн хуваарь гараагүй байна гэжээ.