УИХ-ын гишүүн Ж.Золжаргалаас Виртуал бүс байгуулах хуулийн төслийн талаар тодруулга авлаа. Тэр виртуал бүсэд бүртгүүлсэн компаниуд нийгмийн даатгалын шимтгэл төлсөн төлбөрөө буцааж нөхөж авна. Мөн татвараас чөлөөлөгдөн, шинэ техник технологи хөгжүүлж байгаа бол санхүүгийн дэмжлэг авдаг заалттай мэдээлэл технологийн салбарыг дэмжсэн сайхан хууль бий. Энэ хуулийг хүлээгээд маш олон залуус IT бизнес рүү орсон. Даан ч хууль хэрэгжихгүй байгаагаас IT-гийн залуус гадаад оронд ажиллахаар явж байна. Засгийн газрын тусгай сан Жижиг дунд үйлдвэрлэлийг дэмжих сан, Хөдөлмөр эрхлэлтийг дэмжих сан, Шинжлэх ухаан технологийг хөгжүүлэх сангийн нийт мөнгөн дүнгийн 5%-ийг мэдээлэл технологийг хөгжүүлэхэд зарцуулах хуулийн заалттай. УИХ, гишүүдийн зүгээс энэ хуулийг хэрэгжүүлэх санал асуулгыг Ерөнхий сайдад хүргүүлсэн. Одоогоор виртуал бүсэд орох 100 гаруй компани бүртгүүлсэн байна. Гэтэл санхүүгийн механизмыг шийдэхгүй бол цаг алдаад байна. Санхүүг нь шйидэхгүй бол энэ хууль явахгүй. Асуудлыг шийдэхгүй бол намрын чуулган эхлэхэд хариуцлага ярина. Мөн одоо байгаа Мэдээлэл технологийн паркийн үйл ажиллагааг дэмжих шаардлагатай байна. Монголын залуус дэлхийн бусад орны залуус шиг программ хангамж хийж, хөгжүүлэн олон улсад гарч байна. Хиймэл оюуны алгоритм ч бичиж байна. Илүү сайн хөгжүүлэхийн тулд супер чадалтай компьютер, процессор суурилуулах хэрэгтэй байна. Дата төвүүдэд хиймэл оюуны хүчтэй процессор суурилуулах ажлыг IT парк, Үндэсний Дата төвтэй хамтран хийнэ. Мэдээлэл технологийн салбарыг хөгжүүлэхэд дутагдаж байгаа гол зүйл бол сайн тоног төхөөрөмж, дэд бүтэц байдаг. Энэ ажлыг хийхээр ирэх таван жилийн үйл ажиллагааны хөтөлбөрт тусгасан. Хэрэгжүүлэх болно гэдгийг онцоллоо