Туул голын сав газрын захиргаанаас Туул голын ус хүний буруутай үйл ажиллагааны улмаас нэмэгдэж байгааг анхааруулсан байна. Усны газраас хийсэн судалгаагаар Туул голын суурьшлын бүс дагуух усанд гэдэсний савханцар илэрсэн нь нотлогдсон. Өмнө нь ч арьс түүхий эд боловсруулах үйлдвэрүүд бохирдсон усаа Туул голд нийлүүлсэн зөрчил илэрч байсан юм. Энэ мэт олон баримтаар агаар, ус, хөрсний бохирдол ч аюулын харанга дэлдсээр ирсэн. Шинэ төв цэвэрлэх байгууламж ашиглалтад орохгүй удсанаас зундаа бохироо үнэрлэж, өвөлдөө хоолой хорсгосон утаан дунд амьдарч байсан иргэдийн уух ус бохирдож эхэлсэн нь хамгийн гол анхаарах зүйл. Иргэд Туул голын эрэг дагуу хувцас угаахгүй байх, голын дунд машинаа оруулан цэвэрлэхгүй байх, аж ахуйн нэгжүүд бохироо Туул гол руу нийлүүлэхгүй байх нь эх орондоо хайртай байгууллага, иргэдийн хүлээх үүрэг гэдгийг ухамсарлах цаг болсныг хүн бүрт байгаль дэлхий сануулсаар байна.