Н.Учралын Засгийн газрын хувь заяа дээсэн дөрөөн дээр дэнжигнэж эдийн засгийн амлалтууд иргэдэд өгч эхэллээ. Төрийн албан хаагчдын цалинг инфляцитай уялдуулж нэмнэ. Төрийн үйлчилгээний албан хаагчдын цалинг 50% нэмнэ. Ажил хөдөлмөр эрхэлж байгаа залуус нийгмийн даатгал төлөхгүй. Оюу толгойн ногдол ашгийг иргэдийн өгөөж болгоно. Иргэн бүрийн хуримтлалын дансанд байршуулж юунд зарцуулахыг санал асуулгаар шийднэ гэж мэдэгдсэн. Харин АН тэтгэвэр цалинг нэмэх нь сонгууль угтсан, аж ахуйн нэгжийг сөхрүүлэх алхам гэв. Үнэндээ бол аж ахуйн нэгжүүд нь аль хэдийн цалингаа ч тавьж чадахгүйд хүрсэн, ард иргэд нь ажилгүй байгаа нь үнэн. Хожимдсон хойно нь хайр зарлаад байх шиг. Монгол улсад 790 мянган ажилгүй иргэд байгаагаас 32% нь ажил хайгаад олдоогүй гэж судалгаа өгсөн. Энэ юу хэлээд байна вэ гэвэл төрийн олон жилийн буруу бодлогоос болж үйлдвэрлэл хөгжөөгүй, бүх хэрэгцээгээ импортоор хангаж байгаагаас болсон. Одоо Монголд улс төрчид, бизнесийнхнийг дагасан хэдхэн гэр бүл мөнгөтэй, орлоготой амьдарч бусад нь амь зогоох төдий, үндэсний хэдэн үйлдвэрүүд нь зогсох дээрээ хүрээд байна. Төр нь данхайсан төсвөөр олон ажлууд хийдэг ч иргэдийн амьдралд үр өгөөжөө өгөх нь ховор, улстөрчид нь эрх мэдэл албан тушаалын төлөө улайрч, улс төрийн намууд нь үглэхээс хэтрэхээ больсон. Бүх салбарт том нь жижгээ залгидаг тогтолцоо бий болж, инфляцийн өсөлт үргэлжилж байна. Худалдаа эрхлэгчид иргэдийн худалдан авах чадвар эрс буурсныг хэлсээр сууна. Улстөрчид , намууд толгой дотроо багтсан тойрог, багтаа багтсан хэдэн хүмүүсээс хэтэрч сэтгэдэг байсан бол Монгол улсын хөгжил хэдэн арван жилээр урагшилдаггүй юм гэхэд ухрахгүй байсан даа.