Эрчим хүчний шинэхэн сайд Хүн намын гишүүн Б.Найдалаа ажлаа авмагцаа цахилгааны үнийг нэмнэ. Хүнс, өргөн хэрэглээний бараа бүтээгдэхүүн, орон сууц, дулааны үнэ нэмэгдэж байхад зөвхөн эрчим хүчний үнэ нэмэгдээгүй. Тиймээс эрчим хүчний үнийг нэмнэ гэдгээ мэдэгдсэн. Иргэд эрчим хүчний үнийг бага багаар нэмэхгүй нэг дор ихээр нэмснээс бүх төрлийн бараа, үйлчилгээний үнэ өсч, иргэд байгууллагууд цахилгааны төлбөрөө төлж дийлэхгүй нөхцөл байдал үүссэн. Өнгөрсөн жилийн огцом нэмэгдлээр эрчим хүчний салбар техникийн шинэчлэлтээ хийж чадаагүй хэрнээ инфляци өндөр байхад дахин үнэ нэмэх нь амьдралд нийцэхгүй. Эрчим хүчний салбарын шахааг зогсоож, авлига хээл хахуулиа багасгах хэрэгтэй. Нэг дарга нь хэрэгт холбогдоход 17 байр хурааж байсан. Гэтэл өдгөө 500 тэрбум төгрөгийн өртэй гээд дахин үнэ нэмэх гэж байна. Салбартаа шинэ станцууд барих мөнгийг төсвөөс жил бүр шийдүүлж, цаг тухай бүрт нь цахилгааны хэрэглээг хангахад боломжийг бүрдүүлж байсан бол асуудал хүндрэхгүй байсан гэдгийг иргэд байгууллагууд хэлж байгаа юм. Харин салбарын сайд үнийг огцом нэмэхгүй бага багаар нэмнэ гэжээ. Татвар төлөгчийн нуруун дээр ирэх ачаа дарга нарт хамаагүй бололтой.