Улс төрчид төрийн ордонд зодолдож байх хооронд ахмадууд тэтгэврээ нэмүүлэхээр жагсаж байсан бол эрчим хүчний салбарынхан цалингаа 30% нэмүүлэх шаардлага тавьж Сүхбаатарын талбайд хэвлэлийнхэнд мэдээлэл өгсөн байна. Тэд инфляци өссөн үед 1,8 сая төгрөгийн цалингаар амьдрах боломж алга. Эрчим хүчний салбарын хүнд, хортой нөхцөлд ажилллах бага цалингаар ажиллах залуус олдохоо болилоо. Жилийн өмнөөс шаардлага тавьсан ч эрчим хүчний салбар 600 тэрбумын өртэй гээд шийдэж чадахгүй байна. Тиймээс ЗГ-т хандаж байна гэжээ. Харин иргэд эрчим хүчний үнэ нэмэгдлээ гээд иргэдийн нуруун дээр ирэх дарамт нэмэгдснээс өөр үр дүн харагдсангүй гэдгийг хэлж байгаа юм. Мөн Авто замын компаниуд “Азза” нэгтгэл ажилчдынхаа цалинг тавьж чадахгүй байгаа бол хот тохижилтын байгууллагууд ажилчдаа халж байна гэх гомдлыг иргэд гаргаж эхэлсэн. Эдийн засаг хүндэрсэн үед л аж ахуйн нэгжүүд цалингаа тавьж чадахгүйд хүрч, иргэдийн тавих шаардлага нэмэгддэг. Эрх баригч, улс төрийн намуудад иргэдийн зовлонг шийдэх хүсэл, бодол байгаа бол одоо л ажлаа хийх хэрэгтэй байгаа юм.