Сүр дуулиантай мэдэгдэл хийсэн, маргаан мэтгэлцээн дагуулсан шинэ Засгийн газар бүрдлээ. Шинэ сурагчид хичээл заах боломжгүй гэсэн тодотголтойгоор хуучин сайдуудаа томилж, авлигачдаа албан тушаал сэлгэж, нам фракцийн зодооноо албан тушаалын эвлэрлээр солив. Зарим яамдад мэргэжлийн сайдуудаа андуурч томилсон аятай томилгоо хийсэн. Энэ томилгоогоо эрүүл мэндийн салбарыг цахимжуулна. Сангуудын авлига хээл хахуулийн ард гарна гэж Э.Батшугарыг томилсон гэдгээ Засгийн тэргүүн мэдэгдэв. ЦХХХЯ-ны сайдаар томилогдсон Ч.Номин таны томилогдсон салбарынхан ард иргэдийн цахим аюулгүй байдлыг хангаж чаддаггүй, байсхийгээд л иргэдийнхээ мэдээллийг гаднын хакеруудад алддаг. Дарга нар л албан тушаал ахихаас нэмэргүй, ард иргэд асуулт асуухаар мэдэхгүй чадахгүй гэдгээс өөрийг хэлэхгүй суудаг гэдгийг мэдэж ажиллана гэж итгэе. Гадаад харилцааны сайд Б.Батцэцэг гурван ч Засгийн газар улирч ажилласан ч иргэд нь мөнгө төгрөгөө үрэн байж арай гэж виз аван явахад гаднын орнын хил дээрээс буцаадаг, барьцаа байршуулдаг болсон гээд л салбарынхаа асуудлыг шийдэж чадахгүй уруудсаар л байна. Засгийн газар заавал нам дагасан томилгоо хийдэг болсноос салбарын шилдэг мэргэжилтнүүд сайдын битгий хэл хэлтсийн даргын албан тушаалд ч хүрч чаддаггүй болсоор удсан. Муухан сайдаас дээр ажиллах мэргэжилтнүүд, мэргэжилтэй, чадвартай залуус зөндөө бий. Улстөрчид харсангүй, харахыг ч хүссэнгүй. Хуучин сайдууд томилогддог ч албатай юм шиг хээл хахуульд холбогддог гэмтэй. Шинэ сурагчаас дээр ажиллаарай гэж хүсье. Мөн галтай шийдвэрүүд гаргана гэсэн. Та бүхний гаргасан үнэ, татвар нэмсэн галтай шийдвэрүүд ард иргэдийг хөлдөө чирч, эдийн засгийг элгээр нь мөлхүүлж, инфляцийг хөөрөгдөж, махны үнийг магнаг болгож байгааг санаж ажиллах хэрэгтэй. Асуудлыг шийдэх хүлээлт ихтэй Засгийн газраас ард иргэд албан тушаал ярихаас илүү, амьдралд нэмэр болохоор ажлууд хийхийг хүлээж байна. Ерөөгөөд томилдог ч харахыг хүсэхгүй болтол нь залхаадаг Засгийн газрын сайдуудтай битгий болчихоосой гэж хүсье дээ