Ерөнхий сайд Д.Занданшатарын зовлон Э.Оюун-Эрдэнийн Засгийн газрын сайдууд болсон. Тиймдээ ч байсхийгээд л сөрөг хүчний зүгээс ажлаа хийдэггүй сайдууддаа хариуцлага тооцохгүй бол Засгийн газрыг унагах акцыг идэвхижүүлнэ гэж айлгана. Эрх баригчид ч айлгаж л байдаг юм ард нь гарна гээд гүрийдэг. Харин энэ удаа эрчим хүчний салбарын доголдол сайдуудын суудалтай төдийгүй Нийслэлийн Засаг даргын суудлыг ганхуулах хэмжээнд хүрсэн. Эх орны хөгжилд энэ тэргүүнд шаардлагатай салбарын ажлуудаа хойш тавьснаас шатахуунгүй, цахилгаангүй,ард нийтээрээ ажил нь доголдсон, ахмадууд нь амьдрах боломжгүй болсныг олон нийт хэлж байгаа юм. Анхнаасаа Ерөнхий сайд шинэ гишүүдээр танхимаа бүрдүүлээд явсан бол хойш, урагш жийлцсэн хэдэн сайдуудын хайчин галын тулааны талбарт орохгүй байсан. Улс төр юм хойно нам фракцийн эрх ашгийг хангах гэсээр хадны завсар хавчуулагдсан халиуны зулзага хөөрхий гэдгийн үлгэр болсон. Ажил нь ч урагшилдаггүй, айхтар том амлаж эдийн засаг сэргэсэн гэж байгаа ч дээгүүрээ баяжсан дунд, доод түвшиндээ ажил зогссон, аж ахуйн нэгжүүд нь цалингаа ч тавьж чадахгүй хэмжээнд хүрч, ард иргэд аргаа барж байгаа нь үнэн. Хуучин сайдууд нь ажлынхаа байг ч олохгүй, байшин тойрч гүйгээд төсөл хөтөлбөр эрх мэдэл хөөцөлдөж байгаа нь нууц биш. Тиймдээ ч ахмадууд тэтгэврээ нэмүүлье гэхээр зээлийн хугацааг сунгаж, ахмадын сувилал, асаргаа яриад суугаад байгаа.Тэтгэвэргүй ахмадууд төлбөргүй үйлчилгээ л биш бол түүнийг нь авах боломжгүй. Ажил хийж байгаа нь буруу биш ч хэзээ ямар ажлууд хийх вэ гэдгийг эрэмбэлж мэддэг бол энэ олон асуудал ар араасаа гарахгүй байсан. Хуучин сайдуудтайгаа зууралдаад Засгийн газраа унагах уу, шинэ сайдууд томилоод цааш явах уу гэдэг сонголтонд тулсан. Хэрхэхийг цаг хугацаа харуулах биз.