МАН-ын даргад нэр дэвшиж байсан Ерөнхий сайд Г.Занданшатар, УИХ-ын дарга асан Д.Амарбаясгалан нар намын их хурлаасаа хоёр хоногийн өмнө намын даргад өрсөлдөхгүй гэдгээ мэдэгдэв. Ерөнхий сайд нь нүүрсний хэргийг илрүүлнэ гээд, УИХ-ын дарга нь нүүрсний хэрэгт гүтгэгдсэн ус тосоороо ялгарна гээд шалгуулж байгаагаас болсон. Харин энэ хэрэгт сэтгүүлзүйн салбарын нэр нь тодорхойгүй 40 сэтгүүлч чирэгдсэн гэх. Э, Г гэх нэртэй сэтгүүлчид шалгагдаж байгаа. Нэгийг нь хорьсон, нөгөөх нь хил гарсан олж ирнэ гэж ХЗДХ-ийн сайд Б.Энхбаяр мэдэгдсэн. Гэтэл Э нь сэтгүүлч биш инфлүүсэр, Г нь твиттерын жиргээч болж таарсан. Олон нийт нүүрсний хэргийг хэвлэлийн бага хурлын үеэр нүүрсний машин авсан гэх 40 сэтгүүлчийн нэрийг зарлана гэж хүлээсэн ч зарласангүй. Сэтгүүлчид нэрийг нь хэлээч гэж шаардсан ч хэлсэнгүй. Муу сайнаараа дуудуулдаг ч энэ салбарынхан хараал хэрүүл дундуур яваад зөвийг нь дэмжээд, худлыг нь но-той ноцтойг нь бичсээр ирсэн. Нийт 4000 хүн ажиллаж байгаа тус салбарынхан дунд яс хаясан мэдээллийг өгсөн сайдаас болж нэгнийгээ хардаж гэр бүлийг нь дарамталж сүрдүүлж,элдэв хэрэг гарах дөхсөн. Эзнийг нь илрүүлээгүй нотлоогүй юм бол хууль зүйн салбарынхан түрүүлж дуугарч түмний амьдралыг самрахаа болих хэрэгтэйг сэтгүүлчид шаардаж байгаа юм. Нүүрсний машинтай сэтгүүлчид хаана байна гэх хардсан, сэрдсэн, атаархсан эрэл дунд нүүрсний машин битгий хэл нэг ч дугуй нь аваагүй, хараагүй сэтгүүлчид гайхаж хоцорсон. Улстөрчид голд нь завшсан юм бол ядаж чиргүүлээ олж авья гэх инээдтэй ч юм шиг эмгэнэлтэй ч юм шиг яриа сэтгүүлчид дунд өрнөж байна. Б.Энхбаяр сайдыг сэтгүүлчид нэг тэрбумаар гүтгэсэн гэдэг. Улстөрчдөөс мөнгө авч таныг гүтгэсэн сэтгүүлчдээ, нүүрсний машины эздээ зарла. Зарлаж чадахгүй бол цалин багатай, амьдрах гэж ядаж буй ард түмний нэг хэсгийг хөлдөө битгий чир. Сэтгүүлч ч гэсэн хүн, ардаа амьдралтай ар гэртээ хүн гэдгийг санаж төрийн сайдын ёс зүйг харуул. Энэ салбарт ажиллаж сэтгүүлчид бүр үгээ хэлэх хэлж, хууль бус бүхэнтэй тэмцэх зоригтой байх хэрэгтэй.