Улстөрчид тасархай гоё ярьж байна. Авлигатай тэмцэнэ, ард түмнээ гэсэн сэтгэлээр ажиллаж, аз жаргалтай амьдралыг бүтээнэ, таван Ш хөтөлбөр хэрэгжүүлж, оффшорт байгаа мөнгийг эх орондоо авчирна гэж амласан. Иргэд дэмжээд хүлээсэн ч цалингүй, тэтгэвэргүй, эмчгүй, багшгүй, түлшгүй амьдрах болов. Тиймээс нэг л өдөр 30 жил гуйлаа хүлээлээ. Одоо чадахгүй гээд цалинг 3.5 болго гээд шаардаж ахмадууд өлсөж, багш нар ажил хаяж, эмч нар суулт зарлав. Цалин тэтгэвэр нэмбэл инфляци өснө гэх ганц үгээр айлгаж иргэдийг олон жил ядуу амьдруулсан. Ажилчид нь сая төгрөгөө хүлээн зээлтэй амьдарч, ахмадууд нь арай гэж хоногийн хоолоо залгуулж байна. Баян хоосны ялгаа цэгтээ тулж, нам, улс төрч дагасан нөхдүүд нь гадагш зугаалж өвлийг өнгөрөөж байхад, иргэд нь эх орондоо амьдрах гэж хичээхээс цаашгүй байна. Гаднын орон шиг өдрийн 400 мянгаар ард иргэдээ амьдруулаад өгөөч гэж хэлээгүй. Иргэд цалинтай, орлоготой, ажилтай амар тайван эх орондоо амьдрахыг хүссэн. Олон жилийн турш төрийн бодлогын гадна байсан иргэд гэнэт ухаан орж улстөрчид бага багаар нийгмийн асуудлаа шийдвэрлэж явсан бол ийм асуудал эхнээсээ үүсэхгүй байсныг онцолж тэмцэж байна. Буруутгах аргагүй бодлогын олон жилийн алдаагаа засах шаардлагатайг түмнийг төлөөлсөн түшээд, төр засаг ойлгох цаг нь болсон.