МАН-ын улстөрийн акулууд гэгддэг дарга нар жараахай аятай зодолдсон. Зодоонд УИХ-ын гишүүн Б.Энхбаяр шалба норж, нам, хэвлэлийн салбарын ажилд хэт хутгалдсан хэрэгт уналаа. Намыг хагалган бутаргасан хэргийн эзнээр Я.Содбаатар, Б.Энхбаяр, Ж.Батцэцэг, Ж.Энхбаяр нар тодорсноор зодоон үргэлжилж үр дүнд нь Ерөнхий сайд Г.Занданшатар намын даргаа авч чадалгүй Д.Амарбаясгаланд алдав. Гэхдээ намын бага хурлаас Д.Амарбаясгалан 56.1, Г.Занданшатар 43.9 хувийн саналыг авч, аль нэг нь гуравны хоёр хувь буюу 66 хувийн саналаа авч чадаагүй бүдэрсэн. . Дахин нууц санал хураалт явуулснаар Д.Амарбаясгалан намын даргаар тодорчээ. Түүнийг Дээд шүүх бүртгэх эсэхээс шалтгаалан МАН-ын намын даргын зодоон дуусах эсэх нь шалтгаална. Өмнө нь АН даргын суудлын төлөөх зодоонтой байсан бол өдгөө МАН-аар энэ зовлон үргэлжилж байна.Сонгуулийн дараа төрийн алба үймж түмэн хүн солигддог байсан бол өдгөө нэг байгууллагын дарга солигдоход төр, хувийн хэвшил хамтдаа бужигнадаг болоод байгаа. Зөв хөгжлийг эхэлье гэвэл улстөрөө бага хийж ажлаа их хийх хэрэгтэй байгаа юм.