УИХ-ын гишүүн Б.Түвшин тэргүүтэй 41 гишүүн Нийгмийн даатгалын тухай хуульд нэмэлт өөрчлөлт оруулах тухай хуулийн төслийг талаар мэдээлэл хийлээ.УИХ-ын гишүүд нэгдэн байгууллага, иргэдийн санал хүсэлтийн дагуу гэрээгээр ажиллахад нийгмийн даатгалын шимтгэл төлөхгүй байх хуулийн төсөл санаачилж байна. Өөрөөр хэлбэл цалингаас бусад орлогоос НДШ давхар авдаг байсныг зогсооно. Хуулийн төсөлд нэгдүгээрт, Монгол Улсын өмчийн бүх хэлбэрийн хуулийн этгээд, хүнтэй Иргэний хуулийн ажил гүйцэтгэх гэрээ, хөлсөөр ажиллах гэрээ болон тэдгээртэй адилтгах гэрээ байгуулах ажил, үйлчилгээ эрхлэх хүнийг нийгмийн даатгалд албан журмаар даатгуулагчаас хасаж, гэрээний орлогыг нийгмийн даатгалын шимтгэл ногдох орлогын бүрэлдэхүүнээс хасах.
Хоёрдугаарт, Ажил олгогч ажилтанд олгох хоол, унаа, орон сууцны ашиглалтын төлбөр, түлээ, нүүрс худалдан авахад зориулан мөнгөн хэлбэрээр олгосон хөнгөлөлтийг цалин, түүнтэй адилтгах орлого болон нийгмийн даатгалын шимтгэл ногдох орлогын бүрэлдэхүүнээс хасах заалтуудыг хуулийн төсөлд тусгаж байна. Ингэснээр оюутан залуучууд, тэтгэвэртээ гарсан ахмадууд, хүүхдээ харж байгаа ээжүүд цагаар ажиллах боломж бүрдэнэ. Хөлсөөр ажиллах гэрээгээр ажиллахдаа нийгмийн даатгалын шимтгэл төлөхгүй учир ажиллах хүчний оролцоог нэмэгдүүлнэ гэж үзэж хуулийн төсөл санаачилсан гэдгээ мэдэгдлээ.