Осолд орсон охины минь тархи үхэжсэн амьдрах боломжгүй байсан тул элэг, бөөрийг нь өвчтэй хүмүүст тус болж амьдрал бэлэглэх гэсэндээ хандивлаж донор болгохыг зөвшөөрсөн. Гэтэл охиноо гаргах гээд авах үед хөлийн шөрмөс, бусад ясыг нь авсан байсныг мэдсэн. Тиймээс охиныхоо гурван хүүхдийг хөтлөөд хэвлэлийн хурал хийж байна хэмээн нэгэн ээж уйлсаар ярьсан. Түүнийг охиноо зарсан, П.Батчулуун эмчээс мөнгө шантаачилж байна гэх мэдээллүүд цацагдаж, цахимаар өдөр бүр хараах болсон байна. Тэрбээр миний охин 10 хүнд тусалсан. Гэтэл ингэж харлуулж байгааг ойлгохгүй байна гэдгийг онцолжээ. Гэр бүлийн гишүүдийн зөвшөөрсөн элэг, бөөрөөс өөр эрхтэн авсан бол буруутай хүмүүс хариуцлага хүлээх л ёстой. Амиа алдсан охины гурван хүүхэд ээжийнх эрхтнийг авсан талаарх зүй зохисгүй мэдээлүүдийг хараад сэтгэлзүйн хувьд асар хүнд дарамтад орж байгааг яагаад холбогдох байгууллагууд анхаарахгүй, хэрэгт хөндлөнгөөс орж буй хүмүүст хариуцлага тооцохгүй байгаа юм бол. Хүүхдийн эрхийг хамгаалах байгууллагууд арга ядсан эмээ нь ач нараа дагуулаад хэвлэлийн бага хурал хийж ярих хүртэл юу хийж суусан нь тодорхойгүй байна. Иргэд нийгмийн зэрлэгшил сэтгэлзүйн харгислал хэрээс хэтэрч байна. Кибер гэмт хэрэгтэй тэмцэх газар хүнд ноцтой хэргүүдийг эдийн засгийн гэмт хэрэгтэй тэмцэх хэлтэст шилжүүлээд үндсэн ажлаа хийх хэрэгтэй. Цахимаар гомдол явуулсан ч хариу өгдөггүй. Цахим ертөнцийн хакер, дээрэлхэлт, гадуурхал, хараал зүхэл, тролл багууд дийлдэхгүй болсон байна. Эсвэл прокуророын дэргэдэх мөрдөн байцаах албыг сэргээгээд ажил үүргийн хуваарилалтыг ахин хийх хэрэгтэй гэсэн санал гаргаж байгаа юм. Цахимд дэвшил гарсан гэж дарга нар мэдээлэл хийж, хиймэл л оюун ухаан ярьж суухаар ядарсан иргэддээ ядаж тусалдаг болох хэрэгтэй байна.