Жил бүрийн улсын баяр наадмын өмнө шагналын хур буудаг. Энэ жил ч адилхан шагналын бороо орлоо.Энэ сайхан мэдээнд төр түмнийхээ төлөө олон жил хөдөлмөрлөсөн ахмадууд багтсангүй. Тэдний шагналыг хэн ч хөөцөлдөж явдаггүй, хөөцөлдөх хүнгүйгээс тэр. Үе үеийн ЕТГ-ын ажилтнууд шагналын хэдэн мянган материал дотроо өндөр настай ахмадууд хэд байна. Хэд нь байгууллага нь тодорхойлсноос хойш шагналаа авалгүй удсан,хэд нь нүдээ чилтэл хүлээгээд нас барсныг огт мэдэхгүй. Хугацаа нь хэтэрсэн хэдэн иргэд байсныг мэдэхийг ч хүсэхгүй. Мэдэх ч үгүй. Тэдний хувьд Ерөнхийлөгч шийднэ. Бид мэдэхгүй гэсэн ганцхан үгээр ам таглана.Өмнө нь худлаа үнэн болов цахимаар шүүж өгдөг байсан бол одоо бүр шүүж өгөхөө ч больсон. Тиймээс байнга маргаан гарч байна. Нам дагасан, цүнх барьсан 40-50 насны залуус төрийн шагнал авахад арай эртэднэ.Түрүүлж авлаа гээд түмэнд гайхуулах зүйл хийсэн нь ховор. Тэдний хувьд хэлэх үгтэй, хийсэн бүтээснээ ам бардам хэлэх 70-80 насанд хүрээгүй. Шагнал хүртэх ёстой хүндээ хүндтэй эд . Хүртэх ёсгүй хүнд байгаа оноогүй энгэрийн тэмдэг төдий зүйл. Залуус ахмадуудтай уралдаж шагнал авах гэж зүтгэх бол үнэндээ инээдтэй. Нэгэнт шагнал өгөхөөр шийдсэн бол түрүүлж зарлаад шагналын эзнээ түмний хэлний амны бай болгох ч хэрэггүй. Авсан нэгнийг ч ард нийтээрээ хараах хэрэггүй. Авсан бол авсан өгсөн бол өгсөн тэгээд л дуусдаг байг. Арай хүн чанартай залуус нь ахмадуудын өмнө орж шагнал авахаасаа ичээд очдог ч үгүй.Шагналын материалаа хороо, дүүрэг, нийслэл, төрийн түвшинд судлаад эрэмбэ дарааллаар нь эхлээд олон жил хүнд хүчир ажил хийсэн ахмадууддаа эхлээд олгодог болчихвол маргаан мэтгэлцээн гарахгүй.Ядаж байхад улстөрчид нь инээд алдаад шагнуулах юм. Улстөрчдөд шагналаас авахаас ч илүү албан тушаалын зангараг уг нь бий. Даанч шагналд дуртай болохоор өөрсдийгөө шагнадаг, араас нь хөөцөлдсөөр шагнуулдаг нь үнэн. Дараа нь сонгуулийн үеэр санал өгөх иргэдээ тойлдог хэрэгслийг шагнал болгодог нь харамсалтай. Тиймээс шагналыг судалгаатай олгоё. Иргэд иргэний үнэмлэхний дугаараа бичээд өөрийнхөө нэрийн хэдэд байгааг хардаг ганц шударга, хэвийн ажилладаг системтэй болгох хэрэгтэй. Хэдэн ахмадууд алийн болгон утсаа авдаггүй ЕТГ-ын ажилтнуудыг царайчлах вэ дээ. Цахим засаглалынхан түмний маргаад байгаа асуудалд анхаарал хандуулаад шагналыг шилэн болгочихвол хэн хэндээ амар байхсан. Дарга нарын шидсэн цаасаар дандаа асуудлыг шийддэг байж болохгүй. Ахмадуудын өдөр ахмадууддаа л шагнал өгдөг болъё. Энэ өдөр бусад нь барьцаад, хөөцөлдөөд ч хэрэггүй.Шагнал нэртэй уралдаан өрнөсөн шогийн драм ч болж байна даа.