Төрийн захиргааны албанд томилогдож буй хүн бүрийг ажилд авч буй байгууллагаас Авлигатай тэмцэх газар луу албан бичиг явуулж ашиг сонирхлын зөрчилтэй эсэхийг тодруулдаг. Тэд ч шалгаад хариуг нь өгдөг. Харин тэр хариуных нь хаагуур улстөрчид тэдний тойрон хүрээлэгчид тойроод гардаг юм бүү мэд. Нийслэлийн Засаг даргын орлогч Т.Даваадалай инженерийн компанитай хэрнээ нийслэлийн эдийн засгийг хариуцсан шийдвэр гаргадаг, Гадаад харилцааны сайд нь “Төрийн үнэт цаасны хэвлэл” гэх Монгол улсын иргэдийн гадаад паспортыг хариуцдаг компанитай холбоотой , Боловсролын зээлийн сангаас зээл аваад эргэн төлөөгүй хүмүүс нь бүгд улс төр бизнесийнхэн тэдний хамаарал бүхий хүмүүс байдаг гэх мэдээллүүд өдөр бүр цахимд цацагдаж байна. Өмнө нь ч ашиг сонирхлын зөрчилтэй гэх албан тушаалтныг дарга сайдаар томилсон нэрс, хариуцлага тооцохыг шаардсан жагсаалт олон жил хэвлэлийн хуудаснаа хөвөрсөөр ирсэн. Ашиг сонирхлын зөрчилтэй албан тушаалтнуудыг анхнаас нь ажил томилоогүй бол дараа нь зөрчил үүсэхгүй. Гэтэл ашиг сонирхлын зөрчилтэй нь бүү хэл, зөрчилгүй албан тушаалтнууд ч авлига авах хоббитой болсон нийгэмд дахин дахин томилгоо хийгдсээр л байна. Энэ томилгооны ард улс төрийн нам бий.Намуудад ашиг сонирхлын зөрчилгүй албан тушаалд томилчих дарга сайд нар олдохгүй байгаа гэвэл худал болно. Ард түмнээ боддоггүй юм гэхэд ирэх сонгуулиа бодоод төсвөөс идэж уудаг дарга нараа цэгцлэх цаг болсон баймаар.