Эмч нар цалингаа нэмүүлэх ажил хаялтаа үргэлжлүүлнэ гэж мэдэгдээд байгаа үед ЭМДГ-ын даргыг сольсон. Сольсон үндсэн шалтгаанаа нэг иргэн жилд 350,000 төгрөг эрүүл даатгалд төлсөн хэрнээ 63 сая төгрөгийн үнэ бүхий 346 үзлэг шинжилгээ хийлгэсэн байна. Энэ бол жилийн 365 хоногийн 346-д эрүүл мэндийн үйлчилгээ авсан гэсэн үг. Эрүүл мэндийн даатгалын сангийн дарга нар эмч нартай хуйвалдан 240.000 иргэнд хуурамч даатгал хийж мөнгө завшсан байна гэжээ. Өмнө нь эмч нар иргэдэд хуурамч стори нээж хэвтүүлсэн, мэс засалд оруулсан зөрчил илэрч байсан. Гэтэл одоо хүртэл санхүүгийн зөрчил арилахгүй байна. Тиймээс эрүүл мэндийн даатгалын санг эрүүлжүүлэх цаг болсон гэж эрх баригчид мэдэгджээ. Хэдэн дарга солигдсон ч хяналтын тогтолцоо гэж огт байгаагүй гэдэг нь эндээс харагдаж байгаа юм. Гэтэл МАН-ынхан хэнд буруу өгч дарга нар нь хоорондоо хэрэлдээд байгаа нь огт ойлгомжгүй байгаа юм. Төсвийн мөнгийг хамтарч завшиж байхад байнга солигддог олон дарга нар нүдээ аниад суусан уу гэсэн асуулт гарна. Иргэд нэг үзлэг хийлгээд өөр шинжилгээ хийлгэх гэхээр цаг битүүмжлэгдсэн байна гээд хүлээх хэрэг гардаг. Гэтэл нэг иргэн яаж олон удаа үзүүлсэн нь гайхмаар. Эмчилгээ үйлчилгээ нь өвдсөн хүндээ хүрэхгүй байна гэдгийг олон нийт онцолж эхэлсэн. Харин улстөрчид идсэн уусан хүмүүстээ хариуцлага тооцоод ажилла. Чадахгүй бол чаддагт нь өг гэсэн маргаан өрнүүлж байна. Монголд эрх баригчид ч алга, сөрөг хүчин ч алга. Албан тушаалын тулаан л гэж байна.