Дулааны тавдугаар станцыг барихад нийт 600 сая ам.долларыг төсөвлөсөн байна. Энэ ажлын хүрээнд Баянгол дүүргийн 20 дугаар хороонд 340 Гкал дулаан, 300 МВт цахилгаан үйлдвэрлэх суурилагдсан хүчин чадал бүхий шинэ станцыг барихаар сонгон шалгаруулалтыг зарлажээ. Дулааны тавдугаар станцыг барих урьдчилсан шалгаруулалтад гадаад, дотоодын найман компани саналаа ирүүлсэн. “Шунхлай холдинг” ХХК, “Митайм Интернэшнл” ХХК болон “Чайна уэстэрн повер индастриал” ХХК нар шалгарчээ. Хоёрдугаар шатны шалгаруулалтыг ирэх сарын 6-нд хийнэ. Уг цахилгаан станц шинээр ашиглалтад орсноор Таван шар, 21-р хороолол, Хилчин хотхон, Баянхошуу, 3, 4 дүгээр хороолол болон нэгдүгээр хорооллыг дулаанаар хангах юм. Станцыг 2028 онд ашиглалтад оруулахаар төлөвлөжээ. Тендерт дотоодын компаниудыг оролцуулах хэрэгтэй байгааг олон нийт шаардаж байгаа юм.