Улаанбаатарчууд өвөл болохоор утаандаа хордоод зун болохоор Төв цэвэрлэхийн үнэр, үерийн усанд живж амьдарч байна. Бямба гаригт орсон бороо Таван шарыг бүхэлд нь усанд автуулав.Сонгинохайрхан дүүргийн 19-р хорооны Мираж зочид буудлын урд талын ус зайлуулах шүүрт худгийг огт цэвэрлээгүйгээс Таван шарын авто зам, явган зам нь хүртэл усанд автаж иргэд өвдөг тулсан үерийн усаар гарч чадахгүй аянга, бороонд цохиулан хэдэн цаг зогслоо. Ахмад настнуудын үе мөчний өвчнийг лав үерийн ус сэдрээсэн байх. Жилд нэг удаа хэл амтай цэвэрлэдэг шүүрт худгийг цэвэрлэсэн байсан бол үерийн ус хоёр тийш далан руу салаалан орох боломжтой байсан ч ус олон жолоочийн машиныг эвдэж , иргэдийг шүлс, хог холилдсон үерийн усанд алхахад хүргэв. Замдаа тарсан хог бүхнийг хамсан ус нян бактерийн гаралтай өвчин үүсгэвэл ажлаа хийдэггүй дарга нар ямар хариуцлага хүлээх бол. Дусал ч ус ороогүй далан хоосон байхад төв замаас гарсан ус явган хүний замыг бүрэн эвдсэн. Угаасаа ч брожур нь эвдэрсэн, явган хүний зам нь талын нэг тарсан газар байсан. Ажлаа хийдэггүй дарга нар үнэнээ хэлээд бороо орсон үед зам дагуу завь тавибал ард иргэдэд хүрсэн ажил болох гээд байна. Ниргэсэн хойно нь хашгирав гэгчээр ажил хариуцсан дарга нар борооны дараа утас барин ажлаа хийж байгаа дүр эсгэв. Утас барьж алхахаар борооны улиралд төв замынхаа шүүрт худгийг сард нэг удаа шөнийн цагаар машин бага байхад цэвэрлэх төлөвлөгөө гаргаад ажлаа хийх хэрэгтэй байна. Та бүхний инженерийн шугам сүлжээ хуучирсан, өмнө тавигдсан замууд борооны ус зайлуулах шугамгүй, засаж байна гэх тайлбарыг ард иргэд олон удаа сонссон. Байгаа шүүрт худгийг цэвэрлэж чадахгүй хүмүүс ажил хийсэн дүр эсгэхээр ард иргэд яаж хүлээж авах вэ? Цахим хуудсуудаар нэг та нарын ажилд дүр тавьсан бичлэг цацагдсан.
Мөн Тесо компанийн урд талд өнгөрсөн жил зам тавихдаа брожурыг нь авснаас шинэ тавсан чулуун зам усанд автаж бүрэн эвдэрсэн. Нэг ажил хийх гэж нөгөөг нь сүйтгэхээ боль. Ядаж төв замын брожурыг нь авсан юм бол цемэнтээр өндөрлөгөө хийдэг юм уу хурд сааруулагч тавьж шинэ замаа усанд эвдэхгүй байхаа мэддэг байх хэрэгтэй байна. Мэргэжлийн хүмүүс зам тавьдаг. Хаана тэр эвдэрсэн зам чинь байна гээд байгаа дарга нар өрөөнөөсөө гарч хараад, хариуцсан компаниар нь ажлаа хийлгэ. Хотын төвийн явган хүний бүтэн замыг дахин дахин өргөсгөөд баахан хавтан гарсан. Тэр хавтангаараа эвдэрсэн замуудаа нөхчих. 30 жилийн настай явган хүний замыг тань ажлаа хийхгүй бол үерийн ус гурван жилд л эвдэнэ. Дарга нарын явдаг замыг яаж гоё харагдуулах вэ гэж жил бүр засаж байхаар иргэд их зорчдог замуудаа засах хэрэгтэй байна. Ухаалаг дарга нарын буянаар иргэд зутруу л амьдарч байна даа.