Энэ жил дор хаяж 1.2 сая афган иргэн Иран, Пакистанаас буцаж ирэхээс өөр аргагүйд хүрсэн гэж НҮБ-ын дүрвэгсдийн агентлаг мэдэгдсэн. Олноор нь эх оронд нь буцаах нь Афганистан дахь эмзэг байдлыг дэвэргэж, тогтворгүй нөхцөл бий болгох эрсдэлтэйг анхааруулав.Иран, Пакистан 2023 оноос тус улсад хууль бусаар амьдарч байгаа гадаадын иргэдийг албадан гаргахын тулд тус тусын кампанит ажил эхлүүлсэн. Тэд эцсийн хугацааг тогтоож, хэрэв явахгүй бол албадан гаргана гэж сүрдүүлсэн. Дайн, ядуурал, Талибуудын эрхшээлээс зугтан эх орноосоо дүрвэсэн афганчуудыг хөөсөн гэх бууруутгалыг засгийн газрууд үгүйсгэж байна.