Ерөнхий боловсролын сургуулийн хүүхдүүдээс үе тэнгийн дээрэлхэлттэй холбоотой судалгаа авахад 79% нь дээрэлхэлт байдаг гэсэн хариу өгсөн байна. Дээрэлхэлт хийдэг хүүхдүүдэд тооцох хариуцлага сул байгаагаас жил ирэх тусам энэ төрлийн гэмт хэргийн гаралт нэмэгдсээр ирсэн. Тиймээс цаашид хууль эрх зүйн орчинг бүрдүүлж багасгах шаардлагатай гэдэгт санал нэгддэг ч одоогоор хэрхэн шийдэх эсэх нь тодорхойгүй байна. Төр барилцаж буй түшээдээс эхлээд энгийн иргэд хүртэл нэгнээсээ ажлын энгийн асуулт асууж, зөв харилцаж чадахгүйгээс байнга маргалдаж мэтгэлцдэг. Хувь хүнээс эхлээд албан байгууллага нь хүртэл харилцааны соёлд суралцаагүйгээс ажил нь урагшилдаггүй, алдааг нь хэлээд нэмэргүй, засахад хэцүү орчин нийгмийг томчууд бид бүтээж байна .Бидний бүтээсэн энэ бүдүүлэг ертөнцөд бидний хүмүүжүүлсэн хүүхдүүд зөв хүн болж төлөвшихөд хүнд. Учрыг нь мэдэхгүй хэрнээ өөр бусдын ажил, амьдралд оролцож өөрсдийн хүслээр удирдах гэж оролддог, өөр байгууллагын ажлыг шүүмжилж, унагах гэж зүтгэдэг, өрсөлдөгчөө гүтгэдэг, буруу аргаар ажлаа явуулж болж л өгвөл доромжилж, зодолддог явуургүй явцуу зангаа болих хэрэгтэй. Таны гаргасан үг үйлдэл бүрийг хүүхдүүд дуурайдаг. Гэртээ, ажил дээрээ гаргадаг зан бүр чинь хүүхдэд нөлөөлж мянган мянган бяцхан дээрэлхэгчдийг төрүүлсээр байна. Эхлээд томчууд бид өөрсдөө зөвөөр үлгэрлэж, соёлтой ажиллаж амьдрах соёлд суралцах ёстой. Дараа нь нүдээ томруулж мууг нь гайхсан ертөнцөө өөрсдөө бүтээснээ харах мэлмийтэй болох байх.