Энэ онд нийслэлийн төсвийн хөрөнгө оруулалтаар 19 байршилд 11.7 км авто замын борооны ус зайлуулах шугам угсарна. Үерийн хамгаалалтын барилга байгууламжийн хувьд 28 байршлын 48 мянган шоо метр лаг хагшаасыг, зургаан дүүргийн авто замын борооны болон хөрсний ус зайлуулах 217 км шугам сүлжээний 4,034 шүүрт худаг, 4,171 ширхэг үзлэгийн худгийн лагийн цэвэрлэгээний ажлуудыг Геодези, усны барилга байгууламжийн газар ОНӨААТҮГ-аас хийж гүйцэтгэнэ.
Борооны ус зайлуулах 15.1 километр шугам сүлжээг 12 байршилд угсрахад 12.6 тэрбум, Ганц худаг орчмын үерийн хамгаалалтын даланг барихад 3.9 тэрбум төгрөгийг зарцуулах юм.
Сэлбэ дэд төв, Шархад дэд төвийн ажлын хүрээнд хоёр байршилд 7.2 км хөрсний ус зайлуулах шугамыг угсрах бол Сүхбаатар дүүргийн 13, 14 дүгээр хорооны нутаг дэвсгэрт Сэлбэ голын үерийн ус хуримтлуулах 21.7 га мандлын талбайг хамарсан 1.3 сая шоо метр усыг хуримтлуулах багтаамжтай таван шатлалт усан сангийн барилга угсралтын ажлыг хийж гүйцэтгэнэ.