Намрын ногоон өдрүүд-2024” үзэсгэлэн худалдаа төв цэнгэлдэх хүрээлэнд гарч байна. Дундын зуучлалын хөлсгүйгээр тариаланчдын гараас жимс, ногоог худалдан авах боломжтой. Үзэсгэлэнд 21 аймгаас шалгарсан брэнд бүтээгдэхүүнийг дэлгэжээ. Нийт 200 гаруй аж ахуйн нэгж, иргэн, хоршоо, 21 аймаг болон нийслэлийн төмс, хүнсний ногоо, жимс, жимсгэнэ тариалагч 250 гаруй иргэн оролцож байна. Нутаг бүр өөрийн нутгийн бүтээгдэхүүний дээжийг дэлгэн, өв уламжлал, зан заншлыг таниулах сурталчилж байгаа юм.  Ягаан, цагаан сармис, амтат хулуу, чинжүү, төмс, улаан лооль 3-4 төрөл, япон сортын шар алаг тарвас худалдаалагдаж байгаа. Булганы Сайхан, Өвөрхангайн Баян-Өндөр, Архангайн Хотонтын айраг, Говь-Алтайн суль болон цулхирын гурил, Хэнтийн цөцгий, мойлтой тос, буриад талх, Дундговийн тоор, чавганы компот, Баян-өлгийн ааруул,  Баянхонгорын тэмээн тавхай ааруул, Ховдын тарвас, амтат гуа, Сэлэнгийн утсан загас, талх, Завханы зэрлэг жимс зарагдаж байна.