Цагдаагийн байгууллагад бүртгэгдсэн гэмт хэргийн 75% нь цахим орчинд үйлдэгдсэн байна.
Дархан-Уул аймгийн иргэн Т “TAIEX банкны санхүү” нэртэй фэйсбүүк хаяг руу харилцан тэтгэлэгт хамрагдахаар ХХБ-ны … тоот дансанд 1,460,000 төгрөгийг шилжүүлж залилуулсан,
Дорноговь аймгийн иргэн Ч нь “Эргэн төлөгдөхгүй санхүүгийн тусламжийн талаар дэлгэрэнгүй мэдээлэл авахыг хүсвэл надтай холбогдоно уу” гэсэн нэртэй фэйсбүүк хаяг руу тусламж авахаар холбогдон данс руу нь 580,000 төгрөг шилжүүлж залилуулсан,

Өмнөговь аймгийн иргэн Б “Эргэн төлөгдөхгүй санхүүжилт Монгол” гэх фэйсбүүк хаягтай холбогдож, 21,140,000 төгрөг шилжүүлж залилуулсан хэргүүд ирснээр шалгаж эхэлсэн.
Дээрх фэйсбүүк хаягууд нь танилцуулга, намтрын мэдээлэл байхгүй, нэг мэдээллийг хэд хэдэн удаа давтсан, утга авцалдаагүй мэдээлэл бичсэн. Бусад хэрэглэгчтэй огт харилцаагүй, холбоо барих утас, хаяг байхгүй, бусад хүний нэр, зураг ашигласан байх магадлалтай байгаа тул цагдаагийн байгууллагаас шалгалтын ажиллагаа явуулж байна.
Залилагчид нь “Яг сүүлийн хүнээ бүртгэж байна”, “Яг одоо мөнгө шилжүүлэхгүй бол та хоцорно, та одоо л хамрагдахгүй бол оройтно”, “Надад итгэж болно оо би итгэл даах хүн, Би … байгууллагын төлөөлөгч” зэргээр байгууллага, албан тушаалтны нэр барих нарийн арга хэрэглэж, иргэдийг хуурч мөнгийг залилж байна.
Иймд хуурамч хаягуудаас буруу мэдээлэл авах, хувийн мэдээллээ алдах, мөнгө, эд хөрөнгөөрөө хохирохоос сэргийлэхийг Цагдаагийн Ерөнхий Газраас анхаарууллаа.