МАН-ын даргын томилгоо төрийн томилгоог араасаа дагуулав. УИХ-ын дарга МАН-ын дарга болоод удаагүй байхад Ерөнхий сайд нь УИХ-ын гишүүн Б.Энхбаярыг Хууль зүй дотоод хэргийн сайдаар томилж УИХ-ын даргаа нүүрсний хэрэгт хэрэгт холбогдуулан шалгана гэдгээ зарлалаа. Харин МАН-ын хяналтын хороо шинэхэн ХЗДХ-ийн сайдаа намын нэр хүндийг унагасан, үндэслэлгүй мэдээлэл түгээсэн хэргээр гишүүнчлэлээс нь түтгэлзүүлнэ гэдгээ мэдэгдсэн. Олон нийт улстөрчид зодолдох тусам хэн нь хэн гэдгээ харуулж, Монголын улс төр, нийгэм, сонгогдсон гишүүд нь өнөөдөр ямар өрөвдмөөр болсон нь харагдаж байна. Иргэд, жижиг аж ахуйн нэгжүүд нь яаж ч хичээгээд эдийн засгийн хувьд хөл дээрээ босож чадахгүй байхад албан тушаалтнууд хэдэн тэрбумаар нь мөнгийг баруун солгойгүй үрж, гэрээ хэлбэрээр гадагш урсгасан байх юм. Хэдэн дарга нар суугаад хууль хяналтын байгууллагын ажлыг өрөөндөө ярилцан шийдвэрлэж, албан тушаал томилгоон дээрээ тохиролцож чадахгүй бол нэгнийхээ хэргийг сөхдөг болж. Иргэдийн хувьд идсэн уусан дарга нар нь хариуцлага хүлээж, татвар төлөгчдийн мөнгийг үр дүнгүй үрэхгүй байхыг шаардаж байгаа юм. Төрийн ордоны гадна ахмадууд нь тэтгэврээ нэмүүлэх гээд жагсах байхад төрийн ордонд дарга нар нь маргалдаж, гишүүд нь гурван их наядыг гэрээг үнэ тарифыг нь мэдэхгүй байсан л даа гэх тайлбартайгаар буруу хийсэн байх юм. Гэрээний алдаагаа засахын оронд нам, төргүй зодолддог ч төрийн төсөвт төвлөрүүлсэн, авлигачдаас хурааж авсан гэх тэр их мөнгө хаашаа урссан нь мэдэгдэхгүй алга болж, ард иргэд нь хэдий болтол амьдрахад хүнд байна гэж үглэж суух юм бол.