Монголд улсад инээд хүрч, элэг хөшмөөр шог драм зогсолтгүй үргэлжилж байна. Улстөрчид, намууд нь Монголд байхгүй ажлууд хийж түмэн олон түүнийг нь мэдэхгүй, жагсаал цуглаан хийж, эдийн засаг нь өсөлтгүй хүүхэд шиг таг гацаад байна. Хэдэн тэрбум, их наядаар нь идсэн уусан эздийг нь илрүүлсэн гэдэг ч тооцож байгаа хариуцлага байхгүй усанд хаясан чулуу шиг алга болдог. Хоригдсон нэгэн нь шоронгоос ч томорсоор өршөөлийн хуулиар гарчихдаг шидтэй. Төрөөс хулгайлсан мөнгийг нь хураасан, цуглуулсан гэдэг ч түмэн олон нь шаардан ахмадын тэтгэврийг нэмье гэхээр мөнгөгүй гэдэг гайхалтай үгээр нам таглачихдаг аргатай. ТӨХК-иудын захирлууд нь гурван сая төгрөгийн цалинг голж байхад, ахмадууд нь арай гэж 600 мянгаар өрнөөс өрний хооронд амь зогоодог. Ерөнхий сайд нь бага тэтгэвэртэй иргэдийн мөнгийг нэмж боломжтой эсэхийг судалья гэхээр яамдын сайд нар яагаад ч боломжгүй гээд гэдийчихдэг. Ядарсан ахмадууд нь өлсөнө, багш нар нь цалин нэмэхгүй бол ажил хаяна гээд үнэндээ хэцүүхэн дүр зурагтай амьдарч байна. Ядаж байхад огцорсон Ерөнхий сайд нь тэмцэнэ гээд, Ерөнхийлөгч нь УИХ-ын даргаа хэрэгт тохно гэж хэлээгүй гээд, УИХ-ын дарга нь заавал намын даргад нэр дэвшинэ гэх зэргээр ядарсан юм болж байна. Улстөрчид нь төлөвшихгүй бол түмэн олон үймнэ гэдэг л энэ байх. Иргэдийн хувьд намуудад тараах, УИХ-ын гишүүдэд өгөх, төсвийн хэмнэлтээр гээд олон эх үүсвэрээс ахмадын тэтгэврийг нэмэх боломжтой. Нам доторх хэрүүл тэмцлээ өөрсдөө шийд. Ард иргэд амар тайван, ажилтай орлоготой амьдармаар байна гэж шаардаж байгаа юм.