УИХ-ын гишүүн Б.Батбаатар жагсаалтаар сонгогдсон УИХ-ын гишүүнийг эгүүлэн татах хуулийн төсөл санаачилна гэдгийг мэдэгдээд байсан. Гэтэл Ерөнхийлөгч жагсаалт, тойрог, эрх баригч, сөрөг хүчин гэж ялгалгүй авлигын хэрэгт холбогдсон, ёс зүйн зөрчил гаргасан, УИХ-ын гишүүнийг эгүүлэн татах хуулийн төсөл санаачилж хаврын чуулганы нэгдсэн хуралдаанаар яаралтай горимоор хэлэлцүүлэхээр боллоо. Гишүүдийн эгүүлэн татах асуудлыг УИХ-аар чуулганы нэгдсэн хуралдаанаар хэлэлцэн ҮХЦ-ийн шийдвэрээр эгүүлэн татах юм. Гэхдээ яг хэдэн гишүүний саналаар, ямар зөрчлийг хэдэн удаа гаргасан зэрэг заалтыг хуралдаанаар асуудлыг хэлэлцэх үед ярилцах аж. Хууль батлагдсан өдрөөс эхлэн УИХ-ын гишүүдийг эгүүлэн татах хууль хэрэгжвэл өмнө нь ёс зүйгүй үйлдэл гаргасан, нэгнийгээ дарамталсан, эмэгтэй гишүүдийг сүрдүүлсэн, авлигын хэрэгт холбогдсон гэх зэрэг хэрэгт холбогдсон найман гишүүний асуудал яригдахгүй өнгөрөх магадлалтай юм. УИХ-ын нэгдсэн чуулганы хуралдааны үеэр гишүүдийг эгүүлэн татах асуудлыг хэлэлцэхэд ил санал хураахаар хуулийн төсөлд тусгана. УИХ-д мөнгө, улс төр, бизнесийн нөлөө, намаар сонгогдсон гишүүд хууль дүрмийг удаа дараа зөрчсөөр байвал эгүүлэн татах эрх иргэдэд бий гэдгийг энэ хууль батлагдахад бүрдэх давуу талтай гэж мэдээлжээ.