Төрийн албаны сахилга бат, төрийн хэмнэлт гэж сүртэй ярьдаг ч хэрэгжилт тэг, хяналт сул байгаагаас эрчим хүчний салбарт хэрэгжих ёстой төсөл хөтөлбөрүүдийн мөнгө буруу гараар орсон байна. Хамгийн сүүлд 10 аймагт баригдах дулааны станц барих 600 тэрбумын ажлын гүйцэтгэл хангалтгүйгээс АТГ-аас шалгаад Эрчим хүчний ТНБД асан Н.Тавинбэх өөрийн зөвлөх П.Товуудоржид зөвлөх үйлчилгээ нэрээр нэмэлтээр 13 тэрбум төгрөг олгож хууль зөрчсөн. Эд хөрөнгийг нь битүүмжлэхэд хамгийн бага нь м2 нь 2 сая түүнээс дээш үнийн дүнтэй 26 байрыг хураан авсан. Эдгээр байрны үнэ 400 тэрбумын үнэлгээтэй байжээ. Энэ хэрэгт Эрчим хүчний сайд Д.Чойжилсүрэнг холбогдуулан шалгаж эхэлжээ. Мөн Цахилгаан дамжуулах үндэсний сүлжээ ХХК нийт 78 сая төгрөгөөр бичиг хэргийн материал, албан тавилга худалдан авсан нь илэрсэн байна. Тиймээс иргэд татвар төлөгчдийн нуруун дээр үүрүүлэх төсвийн хулгайг зогсоохыг эрх баригчдаас шаардаж эхэлсэн. Засгийн газрын гишүүд ч авлигын хэрэгт холбогдож байгаа нь олны бухимдлыг төрүүлж байгаа юм.