Монголын улстөрчид гоё амлалт хэлж, иргэдийн чихэн дээр цэцэг ургуулсаар төрд гардаг. Гарсан хойноо иргэдийг яаж гуйж байснаа мартаад эх орны эрх ашгаас илүү нам, бүлэглэлийн эрх ашгийг ярьсаар 4 жилийг бардаг нь гэм биш зан. Ядаж байхад 76 байсан гишүүд 126 болж төсөв зардал нь нэмэгдсэн ч хийсэн ажил нь иргэдийн сэтгэлд хүрэхгүй байна. Улстөрчид хөгжил, зам, том том төслүүд, олон жилийн дараа харагдах үр дүнг ярьдаг. Харин иргэд нүдэнд харагдах бүтээн байгуулалт, иргэдийн амьдралд хүрсэн шийдвэрийг л хардаг. Иргэдийн хувьд ажилгүйдэл, ядуурал буурч, ард иргэд нь амгалан тайван амьдрах орчинтой, хөгжил дэвшсэн эх орныг харахыг хүсдэг. Харамсалтай нь иргэд халаасандаа мөнгөгүй, авсан цалин нь амьдралд хүрэхгүй, инфляци нь тэнгэрт хадсан эх оронд амьдарч байгаагаа хэлж цалин тэтгэвэр тойрсон мэдээлэл л хийж маргалдаж байна. Ирэх сонгуулиар улстөрчид дахин сонгогдохыг хүсвэл хороо дүүргээр, цахимаар иргэдээс авсан санал асуулгаа сайтар судлаад хэрэгжилтийг нь хангачих хэрэгтэй байна. Хамгийн наад зах нь хотын төв тойрсон бүтэн шахам байгаа брожурыг солихоос илүү иргэдийн байнга зорчдог төвөөс алдслагдсан замуудыг засаж, талын нэг тарсан брожурыг солих юм бол та бүхнийг төсвийн мөнгийг хоосон үрлээ гэж бухимдахгүй. Тэнд иргэд амьдардаг. Гэрээсээ гараад явахад тохижилт байхгүй, ард иргэдийн амьдрал цэцэглэхгүй бол дарга нарын гоё амлалтыг тоохгүй, төсөв үргүй зарж хийсэн бүхнийг огт үнэлэхгүй. Иргэд өвөлдөө утаанд умбасан хотод угаартаж,мөсөн дээр бүжиг эргэж, автобусаа хүлээн арай ч дээ арай л босоогооро хөлдлөө гэж гомдоллохгүй. Зундаа бохир үнэрлэж, шалбаагтай усанд сэлэхгүй, түгжрэлд гацахгүй, шаардлага хангахгүй хүнсэнд хордохгүй амьдрахыг л шаарддаг. Нийслэлийг 20 минутын хот болгоно гэж амлаад удаж байгаа ч 200 минутын хот ч болгох чадахгүй байна. Том том төслүүд чухал ч түмний амьдралд юу хэрэгтэй байгааг эхлээд хараад засвал энэ бүхэн хүндээ хүрсэн ажил болно. Өөрөөр хэлбэл олон нийт том том ордон харшаас илүү тохижилт сайтай орчинд, хүлээлт чирэгдэл багатай, эмчилгээ үйлчилгээгээ авч, хүүхэд сурах орчин, хүн амьдрах нөхцөл бүрдсэн эрүүл аюулгүй эх оронтой байхыг л хүсдэг шүү эрх баригчдаа.