Монголын барилгачдын нэгдсэн холбооны ерөнхийлөгч Ч.Наранбаатар:Монголын 1500 орчим барилгын компани нийлээд ч Сэлбэ хорооллын тендерт оролцох боломжгүй байгааг мэдээллээ.Тэрээр нийслэлээс Сэлбэ дэд төвийн орон сууцны иж бүрэн цогцолбор хорооллын тендерт нэгдүгээр багц нь 373 тэрбум төгрөг, хоёрдугаар багц нь 453 тэрбум төгрөг байхаар зарлагдсан. Хэт өндөр үнийн дүнгээр зарласан нь монгол аж ахуй нэгжүүдийг оролцуулахгүй гэсэнтэй адил болсон.Мөн тендерийн шаардлагадаа 2020, 2021, 2022 эсвэл 2023 оны аль нэг жилд 130 тэрбум төгрөгөөс дээш орлоготой ажилласан байх ёстой гэсэн шаардлага тавьсан. Гэтэл цар тахлын дараах эдийн засгийн хямралаас үүдэн энэ салбар хүнд байдалд орсон. 2024 онд гэхэд 4000 гаруй компани хаалгаа барьсан гэсэн мэдээлэл бий. Төр аж, ахуй нэгжээ ажил орлоготой байлгах үүрэгтэй ч ажлаа хийхгүй байна. Тендерт гадаадын компанийг оролцуулах боломжийг нээж урьдчилгаа төлбөр олгохоор тусгасан. Харин монгол компаниуд банкнаас 30 хувийн зээл авч байж оролцдог. Урьдчилгаа төлбөр бараг олддоггүй. Мөн гадаадын компани шалгараад ажил нь удааширсан ч алданги тооцохгүй гэсэн заалт оржээ. Нэг сумтай тэнцэх хороолол барих ажилд нэгхэн компани оролцох гэж байна. Нэг блок барилгыг нэг компанид өгвөл 22 монгол компани ажилтай орлоготой байх боломжтой байсан. Тус тендерт гадаад компани орж ирэхээр ажилчид нь гадаад, бараа бүтээгдэхүүн нь гадаад, манай улсад үлдэх үр өгөөж үгүй болно . Монголын 1500 орчим барилгын компани нийлээд ч энэ тендерт оролцох боломжгүй байна. Нийт 827 тэрбумын ажилд Монгол компани оролцох боломжгүй болж 15 хятад компани орж ирнэ. Хятад компаниуд орж ирсэн тохиолдолд Монголын барилгын салбар хүнд байдалд орно. Тиймээс төрийн өндөр албан тушаалтан, намын удирдлагуудад шаардлага хүргүүлж байна. Дотоодын аж ахуй нэгжүүд тус цогцолбор хорооллыг барих ажилд оролцох хүсэлтэй байна. Үндэсний компани, монгол ажилчдаа ажилтай, орлоготой байхад анхаарч өгөхийг төрөөс хүсэж байна гэв.