Төсвийн мөнгө түмний нүдний өмнө урсаж байгааг хэвлэл мэдээллийнхэн онцолж эхэллээ. Улсын дээд шүүх нэг тэрбумаар шууд дамжуулах төхөөрөмж, 250 саяас 700 саяын үнэтэй гурван туулах чадвар өндөртэй машин авах тендер зарласан олныг бухимдуулсан. Гэтэл Говь Алтай аймгийн ИТХ-ын дарга 240 саяар туулах чадвар өндөртэй машин авахаар зүтгэж, БГД-ийн ИТХ-ынхан Гонконг руу төрийн мөнгөөр аялсан гэсэн мэдээллүүд ар араасаа хөвөрч эхлэв. Ямар туулах чадвар өндөртэй машин 700 сая төгрөгний үнэтэй байдаг юм. Тэрбум төгрөгөөр дамжуулах төхөөрөмж авч байхаар шүүх хурлаа нээлттэй хийчих. Хэвлэлийнхэн үнэгүй мэдээлээд өгнө. Бусад салбарынхан 100 саяар авах төхөөрөмжийг тэрбумаар авдаг нь ямар учиртай юм гээд олон нийт асууж байна. Тендер зарласан, зугаалсан эрхмүүд үнэн худал эсэхэд өөрсдөө тайлбар өгөх л үлдлээ.