Нэг тэрбум гаруй төхөөрөмжид нөлөөлөх чадвартай Bluetooth чип кибер аюулгүй байдалд нөлөөлж болзошгүйг илрүүлжээ. Кибер аюулгүй байдлын Tarlogic фирмийн судлаачдын үзэж байгаагаар дэлхий даяар төхөөрөмжүүдэд суулгасан блютүүт чипэнд нууцлагдсан командыг олсон байна. Эдгээр командыг ашиглан хакерууд итгэмжлэгдсэн төхөөрөмжийг дуурайж, дараа нь ухаалаг утас, компьютер болон бусад төхөөрөмжид холбогдож тэдгээрт хадгалагдсан мэдээлэлд нэвтэрдэг аж. Bluetooth чипийг ESP32 гэж нэрлэдэг бөгөөд Хятадад төвтэй Espressif компани үйлдвэрлэдэг. Судлаачдын үзэж байгаагаар ESP32 нь “WiFi болон Bluetooth холболтыг идэвхжүүлдэг микроконтроллер” юм. 2023 онд Espressif компани ESP32 чипийнхээ нэг тэрбум ширхэгийг дэлхий даяар борлуулсан гэж мэдээлсэн. Ухаалаг цахилгаан хэрэгсэл гэх мэт сая сая IoT төхөөрөмжүүд энэ ESP32 чипийг ашигладаг.