Төрөөс худалдан авах ажиллагааны ил тод байдлыг хангана, 5 ш хөтөлбөр хэрэгжүүлнэ, авлига албан тушаалын хэрэгтнүүдтэй тэмцэнэ гэх зэрэг олон шийдвэрүүдийг сүртэй зарладаг. Амьдрал дээр хэрэгжилт нь хангалтгүй хэвээр байна. Сарын өмнөхөн Эрдэнэт үйлдвэр 50 сая төгрөгөөр аяга худалдан авч, хэдэн зуун сая төгрөгөөр хөгжим хэрэгсэл худалдан авах гэж байна. Ямар хүмүүст 50 сая төгрөгийн аяга бэлэглэдэг байна аа гэх мэдээллүүд цацагдаж Эрдэнэт үйлдвэрийн худалдан авах ажиллагааны тайлантай сар бүр ЗГ танилцана хэмээн гал намдаасан. Гэтэл сар ч хүрээгүй байхад БХЯ долоон сая төгрөгөөр хүмүүсийнхээ тэгш ойг тэмдэглэж аяга бэлэглэхээр зэхэж, Үндэсний Статистикийн хороо 1.4 тэрбум төгрөгөөр компютер техник хэрэгсэл, 77.5 сая төгрөгөөр тавилга худалдан авах тендер зарласан байх юм. Дарга нарын ширээ сандлыг байнга солих ямар чухал шаардлага байдаг юм бүү мэд. Цахим аюулгүй байдлаа хангаж чадахгүй хэрнээ компьютер тэрбумаар нь худалдан авч, туулах чадвар өндөртэй тэр олон машинаар яах гээд байгаа нь тодорхойгүй. Хөдөө орон нутагт заавал үнэтэй машинаар зорчих хэрэгтэй байдаг юм байлгүй. Татвар төлөгчдийн мөнгөөр тоглодог тансаглалаа сүртэй шийдвэрүүд зарладаг дарга хэзээ болих вэ. Иргэд нь ажилгүй, цалин орлогогүй, авсан цалин нь цахилгааны мөнгөө арай гэж төлж, аж ахуйн нэгжүүд нь ажилчдаа цалинжуулж хүчрэхгүй байхад арай дэндсэн тансаглал дунд байгаагаасаа ичих хэрэгтэй