Дээрэлхэлтийг зогсоох аян өрнөж байна. Энэ бол сайн хэрэг. Хүүхдүүд ч нэгдэж олон  ажлууд санаачлан зохион байгуулж байна. Сургууль, цэцэрлэгийн орчинд багш нь хүүхдүүдээ зодож, сурагчид нь нэгнээ дээрэлхэж гэнэ.  Төрийн байгууллагын дарга нар нь зодолдоод нэгнийхээ амь насыг хохироож, олны танил эрхмүүд хар тамхи хэрэглэж, хэрэг төвөгт холбогдсон гээд нийгмээрээ хэлэлцээд дуусдаггүй маргаан өрнөсөөр байна. Гэхдээ дээрэлхэлтийг дахин дахин ярих бус албан байгууллага, аж ахуйн нэгж, айл өрхийн доторх уур амьсгал харилцаа хандлагыг зөв болгох нөлөөллийн ажлууд л зохион байгуулах хэрэгтэй байна. Албан тушаалаараа далайлгасан, авлига нэхсэн, албан хаагчдаа хүн гэж боддоггүй даргатай газрын ажилчид ууртай уцаартай, ажлаа ёс төдий хийдэг нь гэм биш зан.Үүнийгээ ажлын ачаалал их байгаагаас болсон гэдэг. Үнэндээ бол огтхон ч тийм бус. Мэдрэмжтэй, мэдлэгтэй, харилцаа хандлага сайтай байгууллагын хамт олон нийтэч, нэгнээ гэсэн сэтгэлтэй, нэг нь байхгүй бол нөгөөх нь нөхөөд  ажлыг нь хийчих сэтгэлтэй байдаг.  Баячуудын хүүхдүүдэд багш нь сөхөрсөн ангийн хамт олны уур амьсгал хөндий, хүүхдүүд нь  хэдэн хэсэг салсан, хэрхэн нэгнийгээ шоглохоо үг үйлдлээрээ харуулдаг болчихсон байдаг. Мэдээж мөнгө бүхнээс үнэтэй гэсэн ахархан бодолтой томчууд биднээс л болсон хэрэг. Албан байгууллагын тухайд дарга нь намынх бол улстөрийн хэрүүлийг ажил дээрээ чирч ирээд ажилчдаа хэдэн хэсэг тараачихдаг. Сонгуулийн үеэр л намууд улстөржөөд бусад үед улстөрчид нь улстөрөө хийгээд иргэд нь ажиллаж амьдрах ёстой гэдгээ мартддаг. Чи аль намынх вэ, хэний хүн бэ гэсэн хөгийн сэтгэхүй монголчуудыг талцуулж байна. Иргэд нь сонгуулиар саналаа худалдахгүй дүнгээ тавиад, шог санагдаад байвал соёлтойгоор цахимаар байр сууриа илэрхийлэх боломж бий. Нийгмийн орчин, нийтийн сэтгэлзүйг өөрчилье гэвэл айл, албан байгууллага бүрт зөв харилцаа хандлагыг төлөвшүүлэх л хамгийн чухал.