Сонгуулийн Ерөнхий Хорооноос 2024 оны ээлжит сонгуулийн саналын хуудасны загварыг баталсан. Саналын хуудас нь Сонгуулийн тойрогт нэр дэвшигчид өгсөн саналыг тэмдэглэх, нам, эвсэлд өгсөн саналыг тэмдэглэх хоёр хэсэгтэй байх юм. Сонгогч та саналын хуудасны Сонгуулийн тойрогт нэр дэвшигчид өгсөн саналыг тэмдэглэх хэсэгт тухайн тойрогт ногдох мандатын тоотой тэнцүү нэр дэвшигчийг сонгож тэмдэглэнэ. Мандатын тооноос илүү эсхүл дутуу нэр дэвшигч сонгож тэмдэглэвэл санал хүчингүйд тооцогдохыг анхаарах хэрэгтэйг зөвлөжээ. Гадаадын 33 улсад 4746 иргэн саналаа өгөхөөр бүртгүүлсэн байна. Гадаадад амьдарч буй сонгогчид энэ сарын 20-23-ны өдрүүдэд саналаа өгнө.