Монголын сэтгүүл зүйн нэгэн үеийн томоохон төлөөлөл, сэтгүүлч, нийтлэлч Гомбожавын Отгонбаяр агсны сэтгүүл зүйн шилдэг бүтээлийн номын нээлт боллоо.

Нээлтийн үйл ажиллагаанд Г.Отгонбаяр агсны гэр бүл, найз нөхөд, үе үеийн хамт олон болон сэтгүүл зүй, улс төрийн салбарын төлөөллүүд оролцов.

Сэтгүүлч, нийтлэлч Г.Отгонбаярын 1998 оноос хойш бичиж туурвисан сэтгүүл зүйн 1,000 орчим бүтээлээс гэргий Т.Сайханцэцэг нь сонгон дээжилж, сэтгүүлч нөхдөөс нь Д.Тунгалаг, Б.Түвшинтөгс нар хянан тохиолдуулах багт ажиллан, “Нийтлэлч Г.Отгонбаяр” сангаас энэхүү гурамсан ботийг эмхэтгэн хэвлүүлсэн байна.

Энэхүү гурамсан ботид Г.Отгонбаярын улс төр, нийгэм, эдийн засаг, сэтгүүл зүйн бүтээлүүдийг сэдвээр бүлэглэн, он цагийн дараалалд хөрвүүлжээ.