Улаанбаатар хотод Лаг боловсруулах үйлдвэрийн ТЭЗҮ боловсруулах ажлыг БНСУ-ын группуудын нэгдсэн холбооноос 90 сая вон, “Keumkang-Three ENC” консерциум 210 сая воны санхүүжилтээр хийж хүлээлгэн өглөө. ТЭЗҮ-г боловсруулахдаа хатсан лагийг шатааснаар үйлдвэрийнхээ эрчим хүчийг шийдээд зогсохгүй ойролцоох барилга байгууламжуудыг эрчим хүчээр хангасан. Мөн шатаасны дараа гарах үнсийг цементтэй хольсноор барилгын сайн чанарын материал хийх боломжтойг тооцжээ. Хоногт 2500 тонн бохир ус хүлээн авч цэвэрлэн, 200 тонн лагийг усгүйжүүлэн хатааж шатаахад 75 хувийн чийгшилтэй лаг буюу үнс бий болох аж. Өвөлдөө хоолой хорсгосон утаа, зундаа төв цэвэрлэхийн өмхий үнэрт угаартаж амьдарсаар ирсэн иргэдийн хувьд энэ эерэг мэдээ юм.