Үндсэн  хуульд өөрчлөлт оруулж УИХ-ын гишүүдийн тоог нэмэх талаар намууд ярьж эхэлсэн. Иргэд чоно махнаас гарна гэдэг шиг УИХ-ын гишүүдийг нэмлээ гээд УИХ барьцаанаас гарч, төсвийн мөнгийг идэж уухаа болино гэж хэзээ ч байхгүй. Хөгжлийн банкийг хуваагаад залгисан хүмүүс улам л улстөржинө. Толгой томорлоо гээд Монгол улс хөгждөг байсан бол аль хэдийн хөгжих цаг болсон. УИХ-ыг дээд, доод танхимтай болгоод иргэдээс төлөөлөгчдийг сонгодог тогтолцоо руу шилжих хэрэгтэй гэсэн нэг хэсэг байхад нөгөө хэсэг нь 1992 онд Монгол улс 2.1 сая иргэнтэй байсан бол одоо 3.4 сая иргэнтэй болсон байна. Гучин жилийн өмнө нэг гишүүн 27.6 мянган хүнийг төлөөлдөг байсан бол одоо нэг гишүүнд 44.7 мянган иргэн ногдож байна. Даруй 1.6 дахин өссөнөөс төлөөллийн чадамж суларсан байна гэх хоёр байр суурьт нийгэм хуваагдав. Улс эх орноо бодсон сэтгэлээс илүү намаа тахин шүтэх улстөрчид олон байгаа үед Үндсэн хуульдаа гар хүрч данхар бүтцийг данхайлгах мэргэн шийдвэр хэнээс гарсан нь үнэхээр сонин. Эрх баригчид олонхи байгаа үед энэ шийдвэрээ зүтгүүлээд батлах л байх. Эцэст нь иргэд хохирч, эдийн засгийнх нь нүсэр зардлыг нь нуруун дээрээ дааж хүчрэх үү гэдэг л сонин байна.