ОХУ -аас “Төвийг сахих статусаа баримтлах ёстой” гэсэн саналыг Украйнд дахин тавьжээ
* Орос Украины тулаан эхэлснээс хойш 2 долоо хоног өнгөрч, хоёр тал 3 удаа уулзаад байна. Хамтарсан 4 дэхь уулзалт болсон ч “Гал зогсоохгүй бол улстөрийн хүрээнд ямар ч асуудал ярих боломжгүй” гэсэн байр суурийг Украйны талаас хэлсэн. Харин ОХУ-ын талаас “Төвийг сахих статусаа баримтлах ёстой” гэсэн саналыг дахин тавьсан байна. Украины төлөөлөгчид Оросын тал биднийг маш анхааралтай сонсож байна. Гэхдээ тохиролцоонд хүрсэнгүй гэсэн мэдээллийг өгсөн. Талууд өдөр бүр онлайнаар уулзах боломжтой гэдгээ хэлж байгаа юм. Ихэнхи орны хэвлэлээр ОХУ Украиныг маш богино хугацаанд эзэлнэ гэж бичиж байсан ч хүчтэй эсэргүүцэлтэй тулж тулаан үргэлжилсээр байна.
Оросын нисэх компаниуд түрээсээр авсан 515 онгоцыг буцааж өгөхөөс татгалзлаа.
* Европын холбооноос ОХУ-ын эсрэг тавьсан хоригоос агаарын орон зайн хориг ОХУ-ыг хүнд байдалд оруулсан. АНУ, Канад, Их Британи зэрэг орнууд агаарын орон зайгаа ашиглуулах боломжгүй гэснээр гуравдагч орноор дамжин нислэг үйлдэх болсон. ОХУ-ын иргэд Гүрж, Армен руу дүрвэж тэндээ удалгүй барууны орнуудыг зорьж байна. Оросын нисэх компаниуд гадаадаас түрээсээр авсан 10 тэрбум төгрөгийн өртөг бүхий 515 онгоцоо буцааж өгөхөөс татгалзсан. Тухайн онгоцуудыг орон нутгийн нислэгт ашиглана гэдгээ хэлж байгаа юм. Оросын иргэний нисэхийн салбарын орлого буурч, сэлбэгийн нийлүүлэлт зогссоны улмаас нислэг нь зогсох эрсдэлд оржээ.
Орос, Украиныхан цэргүүдийн сэтгэлзүйд нөлөөлөх суртал ухуулга хийж байна
* Оросын талаас Украины цэргүүдэд хандсан суртал ухуулга тарааж байсан. Харин Украины талаас Европын холбооны орнуудаас цэргийн дэмжлэгийн хүрээнд авсан тагнуулын хэрэгслээр Оросын цэргүүдийн гэр лүүгээ ярьсан яриаг сонссоноо хэлсэн. В.Зеленский “Та бүхэн байлдахыг хүсэхгүй байгаа. Та нарын аргагүйдээд орхисон зэвсгээр бид зэвсэглэж байна. Биднийг дэмжиж Украинд 20 мянган сайн дурынхан ирсэн. Та нар зэвсгээ хаяад бууж өгөх юм бол бид хүнлэг ёсоор хандана гэж мэдэгдсэн. Мөн Украинд баригдсан Оросын цэрэг офицеруудын “Укрианыг нацистуудаас салгаад хурдан буцна” гэсэн мэдээлэлтэй байсан гэх яриаг шууд цацаж эхэлсэн талаар дэлхийн хэвлэлүүд мэдээлж байна. Украины Парламентын гишүүд цахим ертөнцийг маш идэвхитэй ашиглаж сурталчилгаа хийсээр байна. Үүнийг цэргүүдийн сэтгэлзүйд нөлөөлөх гэсэн оролдлого гэж үзэж байгаа юм.
ОХУ-д туслах юм бол Хятадад хориг тавина гэдгээ ЕХ-ноос мэдэгдэв
* Оросын эсрэг тавьсан хоригийг цуцалж, эдийн засгийн хүндрэлийг даван гарахад нь туслах юм бол хариу арга хэмжээ авч эхэлнэ гэдгээ Европын холбооноос Хятад Улсад мэдэгдсэн. Хятадын зүгээс ОХУ-т одоогоор цэрэг зэвсгийн болоод эдийн засгийн дэмжлэгийг үзүүлээгүй байгаа юм. Оросын дэлгүүрүүдэд зарим нэр төрлийн бараа бүтээгдэхүүн /элсэн чихэр гэх мэт/ дууссан учир иргэд урт дараалал үүсгэсэн. Гадаад орнуудаас их хэмжээгээр валют авч байна зэрэг олон мэдээллүүд гарах болсон. ОХУ-ын хувьд дэмжлэг авч болох хамгийн гол орон нь Хятад юм.