Сүүлийн үед шаталсан татварын тогтолцоотой болох талаар яригдаж иргэд олон талын байр суурь илэрхийлж байна. Дэлхийн улс орнуудаас Норвеги, Австрали, Япон, Бельги, Хятад, Энэтхэг, Австри улсууд татварын 4-7 шатлалыг хэрэгжүүлдэг. Орлогын шаталсан татвар 3-55% хүртэл байна. Дэлхийн 147 улсаас 100 орчим улс шаталсан татвартай байна. Баялагийн тэгш бус хуваарилалтыг бууруулах үндсэн зорилгоор цалингаас бусад орлогод ногдуулдаг байна. Харин Монгол Улс өмнө нь 2.5 саяас дээш орлоготой иргэдийн цалингаас татвар авахаар төлөвлөсөн нь уул уурхайн буюу хүнд хортой нөхцөлд ажиллагсадын хүчтэй эсэргүүцэлтэй тулж шийдвэрээ цуцалж байсан. Тиймээс энэ удаа автомашин,үл хөдлөх хөрөнгө, тансаг хэрэглээний бараа бүтээгдэхүүн, 5 саяас дээш орлоготой иргэдийн цалингаас татвар авах талаар удирдах түвшинд яригдаж эхэлсэн байна. Хадгаламжийн татварыг нэмэх нь хадгаламжийн дансыг жижиглэх нөхцлийг бүрдүүлдэг сөрөг талтай гэж эдийн засагчид үзэж байна. Хадгаламжийн татварыг зөвхөн өндөр хадгаламжтай хэсгээс авах нь зөв. Цалин болон цалингийн багахан хуримтлал үүсгэсэн иргэд, хүүхдийн хадгаламжаас татвар авах нь боломжгүй гэдгийг олон нийт хэлсээр байгаа юм. Мөн баялаг бүтээгчдийг хөдөлмөрлөх хүсэл сонирхлыг бууруулах сөрөг талтай гэж үзэж буй бол төрийн түвшинд өндөр татвар төлдөг хэсэгт бодлогын дэмжлэг үзүүлдэг болно гэж хэлж байгаа юм. Одоогоор шаталсан татварын тогтолцоотой болно гэсэн шийдвэр гараагүй, Татварын хуулийн шинэчилсэн найруулга УИХ-ын чуулганы хуралдаанаар хэлэлцэгдээгүй байгаа юм.