Татвар төлөгчдийн мөнгийг улстөр, бизнесийнхэн хэрхэн зориулалтын бусаар ашиглаж, хууль зөрчиж байгааг бодитоор нь харуулсан Хөгжлийн банкны хэрэг улс төрийн намуудыг хоёр талцуулж эхлэв. Хууль хяналтынхан үнэн худлын дэнсийг шүүрдэх гэтэл Хөгжлийн банкны удирдах зөвлөлийнхөн тээг тавьж, УИХ-ын гишүүдээр яриулаад байсан учир Ерөнхий сайд нь оролцон байж бүгдийг нь чөлөөлж, нэр бүхий хэдэн зээлдэгч, банкны удирдлагуудыг хууль хяналтын байгууллагад хүлээлгэн өгч ажил урагшлахаар болсон мэдээлэл гарсан. Удалгүй танай манай гэлтгүй хууль зөрчсөн хүмүүст хариуцлага тооцно гэсэн хэрнээ эрх баригчид намынхаа таван сул гишүүнээр туг тахиад өнгөрлөө хэмээн олон нийт гомдоллосон. Гэтэл дахиад Хөгжлийн банкны хэргийг улсын нууцаас гаргахдаа зөвхөн АН-ынхан руу чулуу шидэж байна. Бүх оны Хөгжлийн банкны мэдээллийг улсын нууцаас гарга. Хөгжлийн банкнаас зээл авсан, өгсөн намынхаа гишүүдийн 35 төслийн 300 тэрбумын асуудлуудаа шийд хэмээн АН-ынхан бухимдав. Ямарч байсан Хөгжлийн банкны гэсэн тодотголтой дуулиан дэгдсэн биш 103 тэрбум төгрөг төсөвт төвлөрч, ажил хийсэн хийгээгүй нь ялгарч, бизнес эрхлэгчид авсан зээлийг нь Хөгжлийн банкныхан өгсөн өгөөгүй, ажил уясан уяагүй хэмээн учирлан хэвлэлд ээлж дараалан хандсаар байна. Хэрүүл тэмцэл хийн улстөржиж, ард түмний мөнгийг ах дүүгээрээ хувааж идээд би биш, чи идсэн гэж нэг нэгэн рүүгээ чихэхийг ард олон харлаа. Барьцаагүй зээл өгч болдог, бас болоогүй хөөн хэлэлцэх хугацаа дууссан үндэслэлээр татвар төлөгчдийн мөнгөөр төлүүлж болдог гээд хуулийн цоорхойг хуудуутай нөхдүүд яаж ашиглаж байгаа иргэд хараад бухимдахаас цаашгүй байна. Шударга ёс ярих дуртай улстөрчид танай манай чиний миний гэлтгүй авснаа төлөөд ард түмнээ арай дээр амьдралтай залгуулах хэрэгтэй байна. Алтан дээр суусан гуйлгачид гэж алийн болгон хэлүүлээд явах вэ. Удахгүй эхлэх УИХ-ын хаврын чуулганы хуралдаанаар Хөгжлийн банкны тухай хуульд нэмэлт, өөрчлөлт оруулах тухай хуулийн төслийг хэлэлцэх үеэр хуудуутай заалтаа өөрчилж төр муу, менежер гэсэн муу нэрнээсээ сална л гэж найдья.