Монгол Улсад өнөөдрийн байдлаар нийт 6,819 стандарт хүчин төгөлдөр мөрдөгдөж буйгаас хамгийн олон буюу 802 нь эрүүл мэнд, 663 нь хүнс, хөдөө аж ахуйн салбарынх байна. Эрүүл мэнд болон хүнс, хөдөө аж ахуйн салбар бол хүн амын эрүүл мэнд, амь нас, цаашлаад үндэсний аюулгүй байдалтай шууд хамаатай салбарууд учраас цаг үе, нөхцөл байдалтай уялдуулан зарим стандартыг нэн даруй өөрчилж, шинэчлэх, шаардлагагүй хэсгийг нь хүчингүй болгож эхэлжээ. Эрүүл мэндийн салбарын 407 стандартыг дахин хянаж, шинэчлэхээр дүгнэлт гаргаснаас одоогоор 31 стандарт буюу 7.6%-ийг шинэчилжээ. Хүнс, хөдөө аж ахуйн салбарт нийт 570 стандартыг дахин хянаж шинэчлэх шаардлагатай гэж дүгнэлт гарсан байдаг ч 64 стандартыг л хянаж шинэчилсэн
Хүнсний хангамжийн гол нэрийн 16 бүтээгдэхүүнээр тооцоход манай улсын хүн амын хүнсний хангамж малын мах, сүү, сахар, ургамлын тос, гурил, төмс зэрэг зургаан нэр төрлийн бүтээгдэхүүн зонхилж буй нь амин дэм, эрдэс бодисын дутагдалд өртөхөд нөлөөлдөг. Хөгжингүй орнуудад хүнсний бүтээгдэхүүний шошгын ар дээрх мэдээллийг боловсруулалт хийж, сав баглаа боодлын нүүрэн хэсэгт тухайн бүтээгдэхүүний чанар, стандартыг A, B, C, D, E гэсэн таван ангиллаар, гурван өнгөөр ялгаж байршуулдаг аргачлалыг сүүлийн жилүүдэд нэвтрүүлж эхэлсэн. Жишээ нь, ногоон өнгөөр ялгасан А ангиллын хүнс илүү шим тэжээллэг, органик ангилалд багтдаг бол улаан өнгөөр ялгасан Е ангиллын хүнс шим тэжээл хомс, эрүүл мэндэд эрсдэлтэй хүнс гэдгийг шууд илтгэдэг байна.