Байгаль орчин, аялал жуулчлалын сайд Б.Бат-Эрдэнэ “Эрдэнэс Оюу толгой” компанийн Гүйцэтгэх захирал Н.Цэрэнбат болон бусад албаны төлөөлөл Өмнөговь аймгийн Ханбогд сумын нутагт үйл ажиллагаа явуулж буй “Оюу толгой”-н уурхайн цогцолборт ажиллалаа. “Оюу толгой”-н Гүйцэтгэх захирлын үүргийг түр орлон гүйцэтгэгч Жак ван Тондер, Эрүүл мэнд, аюулгүй ажиллагаа, байгаль орчин, аюулгүй байдал (ЭМААБОАБ) хариуцсан Ерөнхий менежер Филип Абрахам нар хүлээн авч, баяжуулах үйлдвэр, ил уурхайн үйл ажиллагаа, гүний уурхайн бүтээн байгуулалтын явцыг танилцуулав. Энэ үеэр “Оюу толгой” компани 100 сая мод тарих гэрээ байгуулсантай холбоотойгоор ойн салбарын мэргэжилтэн бэлтгэх, инновац, дэвшилтэт технологи нэвтрүүлэх чиглэлд анхаарч ажиллаж буйгаа танилцууллаа. Мөн Сэлэнгэ аймагт бичил уурхайн нөлөөгөөр эвдэрсэн газруудын нөхөн сэргээлтэд оролцох хүсэлтэй байгаагаа илэрхийллээ.