Сэтгүүлзүйн салбарын 9 залуу сэтгүүлчийн сургалтын төлбөрийг төлсөн  М.Батдорж сангаас, “Усны тухай нэгдсэн ойлголт мэдээлэл” сургалт зохион байгууллаа. Усны газраас цэнгэг усны нөөц, гол мөрний урсац бүрэлдэх эхийн 55 хувийг 2024 он гэхэд улсын тусгай хамгаалалтанд авахаар төлөвлөсөн. “Хөх морь” төслийн хүрээнд 12 том гол дээр 33 байршилд гадаргын усны хуримтлал бий болгон усан хангамжийг нэмэгдүүлэх, урьдчилсан судалгааг хийж, Орхон-Онги, Хэрлэн-Тооно төслийн ТЭЗҮ-г боловсруулжээ. 2020 онд Дорнод аймагт 161 гадаргын усны эх үүсвэр ширгэсэн бол Сэлэнгэ, Сүхбаатар, Хэнтий, Ховд , Хөвсгөл аймгуудад сэргэсэн эх үүсвэр олон байна. Усны нөөцийг хамгаалах нөхөн сэргээх ажлын хүрээнд 2007-2020 онд 2905 булан шандны эхийг хамгаалсан.Монгол улс жилд 591 сая м3 ус ашигладаг. Усны ашиглалт жилээс жилд нэмэгдэж байгаа учир гадаргын усны хуримтлал үүсгэх шаардлагатай байгааг энэ үеэр онцолсон юм. Гадаргын ус, гүний ус нь бие биеэ нөхдөг. Газрын гүний ус багассан тохиолдолд гадаргын усын татан авснаар гол мөрний урсац татарч, тасардаг байна. Монгол орны усны нөөц 564.3 км3, газрын доорх усны 10.8 км3 байдаг. Хөдөө аж ахуй, уул уурхай, эрчим хүч, зам тээвэр, үйлдвэрлэл, худалдаа, үйлчилгээний гээд бүх салбарт зөвхөн газрын гүний усыг ашигладаг. Иргэд бид гар нүүрээ угаах, почкины ус татахдаа хэдэн литрээр нь гүний усыг хайр гэмгүй урсгадаг. Тиймээс эх дэлхийгээ хайрлан, усны нөөцөө хамгаалж, аж ахуйн нэгжүүд саарал усыг ашиглах нь усны ашиглалтыг сайжруулах ажлын эхлэл болох юм.