Улаанбаатар хотын улсын төсөвт төвлөрүүлдэг 420 тэрбум төгрөгийн орлогыг нийслэлд үлдээсэн. Ингэснээр Улаанбаатар хотыг бие даасан эдийн засагтай болох суурь алхмыг тавьж өгсөн. 2024 ондоо багтаан хөнгөн галт тэрэгний эхний туршилт, хурдны замын ажлуудыг эхлүүлнэ. Туулын хурдны замын ТЭЗҮ, ажлын зураг нь хийгдчихсэн. Тиймээс таван жилийн дотор хоёр төслийг хэрэгжүүлж дуусгах саналыг БНХАУ-д албан ёсоор тавьсан. Талууд хоорондоо зөвшилцөн, хэлэлцээрийн түвшинд явж байна.
Баганан тулгуурт хөнгөн галт тэрэг буюу LRT-ийг гүүрэн байгууламж барина. Энэ төслийн хүрээнд таван жилийн хугацаанд гурван чиглэлд 50 км орчим үргэлжлэх гүүрэн байгууламж барина. Мөн Улаанбаатар хот аюулгүйн гуравхан гарцтай. Газар хөдлөлт болоод бусад төрлийн гамшиг, аюул тохиолдлоо гэхэд Улаанбаатарчууд маань хотоос гарах гарцан дээрээ, гудамжиндаа түгжрэх аюул бий. Тиймээс тойрог зам байгуулж, хотын иргэдийн амь нас, эрүүл мэнд, цаашлаад эд хөрөнгийг авран хамгаалах гарц шийдэл болгож, тойрог хэлбэрийн хурдны замыг байгуулна. Энэ ажлын хүрээнд нэг талдаа гурван эгнээ, хоёр урсгалтай хурдны зам байгуулахаар төлөвлөж байна. Дэлхийн санхүүгийн байгууллагуудын зүгээс Улаанбаатар хотод шууд зээлийн эх үүсвэр олгох саналуудыг тавьж байгаа. Ард түмэндээ амласан түгжрэлийг бууруулан, төвлөрлийг сааруулах төсөл, хөтөлбөрүүдийг товлосон хугацаандаа хийж чадна гэдэгтээ бүрэн итгэлтэй байна гэж нийслэлийн Засаг дарга Д.Сумьяабазар амлалаа. .