Авлигатай тэмцэх газраас Хөгжлийн банкны асуудлаар мэдээлэл хийлээ. Тус банкнаас 52 зээлдэгчийг шалгуулахаар АТГ-т хандсан. Зээлийг хуулийн дагуу олгосон эсэх, зээл олгосон албан тушаалтнууд нь эрх мэдлээ урвуулан ашиглаж зээлдэгчид давуу байдал олгосон эсэх, хахууль авсан эсэх, улсад хохирол учруулсан эсэхийг шалгах ажлын хэсэг байгуулан ажилласан. Хэргийг шалгах явцад 186 үл хөдлөх хөрөнгө ,124 тээврийн хэрэгсэл, 1 үйлдвэрийн барилга, 1 лизенз, 13 дансыг битүүмжлэн захиран зарцуулах эрхийг нь хязгаарласан. Нийт 8.5 тэрбум төгрөгийн зээл эргэн төлөгдсөн. Иргэд хөдлөх болон үл хөдлөх хөрөнгө худалдан авахдаа эх үүсвэр, бүртгэлийн маргаантай эсэх, аль нэг банкны барьцаанд байгаа, хуулийн байгууллагын хязгаарлалт тогтоосон эсэхийг нягталж байх хэрэгтэй байна. Хэрэв барьцаанд байгаа эд хөрөнгийг худалдан авбал эргэн шүүхийн маргаан үүсэх, эд хөрөнгөөрөө хохирох магадлал өндөр байна. Жишээлбэл УИХ-ын гишүүн асан Б.Ундармаагийн хамааралтай “Гантиг вилла” төслийн есөн блок барилга Хөгжлийн банкны барьцаанд байгаа хуулийн байгууллагаас хязгаарлалт тогтоосон. Тиймээс байр худалдан авахдаа барьцаанд байгаа эсэхийг тодруулахыг анхааруулж байна. Хэргийг шалгах явцад нэг настай хүүхдийн нэр дээр улсын бүртгэл нээсэн асуудал үүссэн. Ард нь нөлөө бүхий хүмүүс байх магадлал өндөр хэмээн шалгаж байна. Тус банкнаас зээл авсан байгууллагууд зээлээ эргэн төлж улсыг хохиролгүй болгох ёстой гэсэн юм.