Монголын сэтгүүлчдийн нэгдсэн эвлэлээс сэтгүүлчдээ ажлаа хийснийхээ төлөө эрх мэдэлтнүүдийн дарамтанд өртөж байгааг эсэргүүцэн мэдэгдэл гаргасан бол, мэргэжил нэгт сэтгүүлчид хамтран улс төрийн албан тушаалтнуудын хууль бус үйлдлийг эсэргүүцэн хэвлэлийн бага хурал зарлалаа.Хэвлэлийн хурлын үеэр МАН-ын Ерөнхий нарийн бичгийн дарга асан, Удирдах зөвлөлийн гишүүн, Элчин сайдаад ажиллаж байсан Ё.Отгонбаяр сэтгүүлчдийг Хөгжлийн банкнаас авсан эхнэрийнхээ 17.7 тэрбум төгрөгийг төл гэж бичсэний нь төлөө амь насанд нь халдахаар заналхийлан “Ална” гэсэн. Энэ бол хүний амьд явах эрх эрх чөлөөг зөрчих ноцтой үйлдэл. Тиймээс Хууль зүй дотоод хэргийн яам, Эрүүгийн цагдаагийн газар, МАН-ын удирдлагуудад хандаж албан бичиг хүргүүлж байна. Энэ асуудал бол зөвхөн нэг улс төрчийн асуудал биш. Олон нийтэд ил гарган зарлаж байгаа нь энэ болохоос цаана нь хэдэн зуун сэтгүүлчид ажлаа хийснийхээ төлөө “Машинаа болгоомжтой барь, Ард талаа харж яв” гэх зэргээр дарамтанд өртөж байна. Тиймээс хэвлэлийн эрх чөлөөний тухай хуулиар сэтгүүлчдийг хамгаалалтанд авах ёстой. Хэвлэлийн хагас эрх чөлөөгөө бид алдмааргүй байна.Бидэнд ажлаа хийхэд байнга хүндрэл учирдаг. Цаашид энэ мэт хууль бус үйлдлийг зүгээр хараад суухгүй.Хэвлэлийн эрх чөлөөг, иргэдийн мэдээлэл авах эрхийг хаасан үйлдэл гэж үзэж байна. ОХУ, Турк гээд олон оронд сэтгүүлчид ажлаа хийж яваад баривчлагдан, буудуулсан тохиолдол бий. Бид нийт сэтгүүл зүйн салбарынхны өмнөөс үгээ хэлж байна гэдгийг онцолсон.