Эрх баригчид он гарсаар халаа сэлгээ томилгоог толгой дараалан хийж хариуцлага тооцох болсон. Байгаль орчин аялал жуулчлалын сайд Н.Уртнасан Төрийн нарийн бичгийн дарга Д.Ганболд нарыг агаарын бохирдлын эсрэг ажил хэрэгжүүлээгүй үндэслэлээр хариуцлага тооцсон. Нийслэлийн агаар орчны  бохирдлын асуудал хариуцсан төслүүдийн удирдагч Д.Ихбаяр, Нийслэлийн  агаар орчны  бохирдолтой тэмцэх газрын дарга Б.Пүрэвсүрэн нар  бас албан тушаалаа өглөө. Шүлхийтэй өвчнийг олон аймаг сумдад алдсан буруутнаар мал эмнэлгийн газрын даргыг тодорхойлж бас л халсан. Томилгооны хувьд  Н.Уртнасангийн оронд  ШӨХТГ-ийн дарга Б.Бат-Эрдэнийг томилж, БОАЖ-ын Төрийн нарийн бичгийн даргын орлон гүйцэтгэгчээр А.Энхбатыг томиллоо. Солонгост 13 настай охин 6 цагийн турш зодуулсан байхад хэвлэлээр цацагдсаны дараа мэдсэн БНСУ-д элчин сайдаар томилогдсон Намсрайн Эрдэнэтуяаг эргүүлэн татаж, Эрдэнэцогтын Сарантогосыг, Монгол улсаас Кувейтад  суугаа Элчин сайд Зоригтын Чинтүшигийг эргүүлэн татаж, Пүрэвийн Сэргэлэнг;, Швейцарын Холбооны Улсад Элчин сайдаар Л.Пүрэвсүрэнг эргүүлэн татаж, Даваасүрэнгийн Гэрэлмаа нарыг тус тус шинээр томиллоо.  Хариуцлагагүй ажилласан хэдэн ч сайд, хичнээн ч даргыг халж сольж болно. Шинээр томилогдсон сайд, дарга нар нь ажлаа сайн хийхгүй бол ахиад л ард иргэд бухимдаж, жагсаал цуглаандаа хүрнэ. Боловсон хүчний нөөцөөрөө тэргүүлдэг намд намын ажил хийгсэд олон болохоос төрийн ажил хийгсэд дутаж байгааг хийж буй ажил, хэрэгжүүлж буй бодлого шийдвэр нь харуулаад байна. УИХ-ын гишүүн С.Бямбацогт чуулганы хуралдааны үеэр элчин сайдууд зүгээр жижүүр гал унтраагчийн үүрэг гүйцэтгэж байна хэмээн ёс төдий ажиллаж ирснийг нь шүүмжилсэн. Тиймдээ ч сонгууль өнгөрөөд удаж байхад байхад бодлого, төлөвлөгөө ярьсаар бүтэн хоёр жилийг ардаа үдлээ. Хэзээ ажлаа хийж шинэ сэргэлтийг авчрахыг иргэд хүлээсээр сууна. Улстөрчид ухаарах биз ээ.