Монгол хүний удмын санг хамгаалах хуулийн төслийг УИХ-ын чуулганы хуралдаанаар орж хэлэлцэгдэн дэмжигдлээ. Энэ хуулийн хүрээнд айл өрх бүр угийн бичиг хөтлөх, ирээдүй хойч үр хүүхдүүдээ ах дүү хамаатан саднаа танилцуулах, монгол ёс заншил, удам судраа дээдлэх үзлийг төлөвшүүлэх зэрэг олон чухал асуудлыг хэлэлцсэн.Өмнө нь ч одоо ч угийн бичгийг хөтөлдөг айл өрх ховор. Хөтөлж байгаа нь өвөг дээдсээ мэдэх нь бага. Тиймээс угийн бичгийг өөрсдийн мэдэхийн хирээр айл өрх бүр хөтлөх нь зөв. Гэхдээ улсын иргэний бүртгэлд ургийн  овгийг давхцуулахгүй байх нь нэн чухал. Ургийн овог давхардсан, нэг овгийг олон айл өрх хэрэглэдэг гэсэн маргаан хэлэлцүүлэг ч өрнөж байсан. Ж.Чинбүрэн гишүүн удамшлын генетик судалгаагаа эхлүүлж шинжлэх ухаан технологи хөгжсөн үед дэлхийн бусад орны адил гэр бүл болох гэж буй хосуудыг цус ойртолтоос сэргийлэх олон  шинжилгээ судалгаанд хамруулах хэрэгтэйг онцолсон. Энэхүү ажилд олон судлаач эрдэмтдийг оролцуулж төр засгийн түвшинд дэмжин ажиллах  хэрэгтэйг хуулийн төслийг хэлэлцэх үеэр танилцуулсан судалгааны дүн харууллаа.