Байгаль орчин аялал жуулчлалын сайд Н.Уртнасан гэр хорооллын дээгүүр дрон нисгэж шахмал түлшний хэрэглээнд хяналт тавина гэсэн нь олны дургүйцлийг хүргэж цахимаар иргэд бухимдлаа илэрхийлэв. Буруу буруу бүхэн бусдын буруу гэдэг шиг агаарын бохирдлын гол буруутан нь иргэд болсоор удсан. Иргэд галаа түлж чадахгүй, яндангаа хөөлөхгүй, зуухаа солих хэрэгтэй гэдэг байсан бол өдгөө иргэдээ дарамталж байгаа юм шиг хянана шалгана гэсэн нь дургүйцлийг нь хүргэж орхив бололтой. Иргэдийн хувьд өвлийн хүйтэнд даарч чичирч суухаас илүү үнэ өндөртэй хэдэн модоо асаагаад, шахмал түлшээ өрдөөд дулаан суухыг илүүд үзнэ. Харин шахмал түлшийг нь түлэхээр утаа баагиад толгой нь өвдөөд, асалт удаан байгаа болохоор аргаа барж байгаа байлгүй. Н.Уртнасан сайд гэр хороололд амьдарч гал түлж, даарч  үзээгүй нэгэн. Тиймдээ ч өдөр бүр гал түлдэг иргэдийн зовлонг мэдэхгүй. Зовлон мэдэхгүй хүн тэнгэрийн шийдвэр гаргаж, амьдралаас хол тасархай сэтгэнэ.  Сэтгэснийхээ хирээр ярьж шүүмжлэлд өртөөд байгаа бололтой. БОАЖ-ын сайд Монгол Улс дэлхийд агаарын бохирдлоороо гуравт орж иргэд нь хорт бодисоор амьсгалж, хорвоотой мэндэлж чадаагүй үрс олширч байгааг мэдэж байгаа болов уу. Хэрэв та мэдэхгүй байгаа бол хэдэн сар гэрт амьдраад гал түлээд үзчих дараа нь иргэдээ дарамтал.. Эсвэл ард иргэдээ шахмал түлшээ хатаагаад түлээрэй гээд хэлсэн бол та ажлаа арай мэддэг нэгэн шиг харагдах гээд байна. Өнгөрсөн долоо хоногт  70 настай эмээг нүүрс түлсэн хэмээн Зөрчлийн хуулиар далайлгаж 100 төгрөгөөр торгож шахмал түлшийг хураан , ороолт түлсэн иргэнийг загнасан нь утаандаа бухимдаж суугаа иргэдийн уурыг барсан байхад дайран дээр нь давс нэмж шалгана торгоно гэдэг нь хэр оновчтой юм бол. Хянаж шалгахад хүртэл учир бий. Нэг айлд олон дахин очиж нэг их ажил хийсэн болж харагдах гээд ч хэрэггүй. Ард иргэдийн нь амьдрал хүнд,  шахмал түлш нь асахгүй болохоор ороолт түлснээрээ иргэн буруутан болсон. Харин ажлаа хийж чадахгүй байгаа дарга нар хэр буруутай бол . Шаардлага хангасан түлш зарж байгаа бол өнгөрсөн жилийнх шиг иргэд нь агаарын бохирдол багаслаа ашгүй дээ гээд сууж байх байсан байлгүй. Ажлаа хийх гэж байгаа ч арай өөр өнцгөөс хараад ард түмнийхээ амьдралд нэмэр болохыг нь сонгосон нь дээр байх. 450 тэрбумыг утааг бууруулахад зарцуулаад арилгасан шүү хэмээн сүржигнэж байсан дарга нарын мэдэгдэл өнөөдөр даанч дээ гэмээр болж гэрийн дээврийг, цагаан сарын буузыг хар болгож, гашуун утаа хоолой хорсгож байна. Сайдын нисгэсэн олон дрон агаарын бохирдолтой орчинд ажиллахгүй эвдэрч татвар төлөгчдийн мөнгийг нэг бол салхинд хийсгэнэ. Үгүй бол түрүүлээд шалгалтаа  зарлачихдаг болохоор нүүрс түлдэг айлууд нь түлэхээ болино. Эндээс үр дүн харагдахгүй. Ингэж иргэдтэйгээ муур хулгана болж тоглож байхаар барьцалдуулагч бодист нь анхаарчих л даа гэж сайдад цахимаар зөвлөгсөд олон байна. Сайд та нэг анхаарал хандуулж ажлаа зөв явуулна биз.