Засгийн газрын бүтэц бүрэлдэхүүнд өөрчлөлт орж давхар дээлтэй сайдуудын тоог нэмэх сургаар эрх баригч нам доторх сайдад горилогсод нэмэгдэж, фракциудын дайн эхлэв. Тиймдээ өөрсдийн фракциас нэр дэвшигчдээ дэмжүүлчих санаатай бор шувуу нисгэж, дан дээлтэй сайдуудыг шоглож,чуулган байнгын хорооны хуралдаан дээр учир зүггүй загнаж ажлаа мэдэхгүйг нь гайхацгаасан. Бүтэц яригдаагүй байхад бол дуугүй байсан нь хожино гэсэн зарчим баримталж байсан тэдэнд боломжит  цаг нь ирсэн үед олон нийтийн өмнө том дуугарч сайн муугаа дуудалцах нь ялгарах ганц тактик нь. Үндсэн хуулийн цэцийн хуралдаанаас шийдвэр гарч Засгийн газрын сайдуудыг давхар дээлтэй байх эсэх нь шийдэгдээгүй байхад Үндсэн хуульд өөрчлөлт аль хэдийн нь өөрчлөлт оруулсан юм шиг урьдчилсан прогноз гаргаж эрх мэдлийн төлөөх тэмцэл өрнүүлцгээсэн. Гэтэл Цэцийн хуралдааны тов хойшилсон нь хоёр жилийн давтамжтай дарга сайд нараа сольдог заншилтай улстөржсөн дарга нарын  уур цухлыг барж, шинэхэн намын даргаа тойрч эргэлдэн, болохгүй болохоор нь хүссэн нэгэн хясал болоод буй албан тушаалын зүүднээсээ сэрэхгүй гэсэндээ шинээр байгуулагдсан хоёр яамны бүтэц бүрэлдэхүүнийг батлан, сайдыг нь томилохыг яаруулсан шуум нисгэсэн. Шахаанд орсон намын дарга арга буюу яамдын бүтэц орон тоог баталсан. Гэхдээ сайдын томилгоог шууд хийж чадсангүй Үндэсний хөгжлийн газар, Харилцаа холбоо, мэдээлэл технологийн газрыг татан буулгаж, Цахим хөгжил харилцаа холбооны яамны сайдыг Б.Жавхлан, Эдийн засаг хөгжлийн яамны сайдыг Л.Энх-Амгалангаар түр хавсран үүрэг гүйцэтгэгчээр томилов. Одоо байгаа бүтэц дундаас энэ хоёр сайд албан тушаалаасаа мултрахгүй гэдэг нь тодорхой болов. Хоёр яам итгэн хариуцуулсан сайд нараа нараа халахгүй. Харин сайдын суудалд горилогсод дотроос Ё.Баатарбилэг, Ё.Бямбацогт, М.Оюунчимэг, Х.Болорчулуун Ж.Чинбүрэн, Х.Батжаргал нараас хэн нь дэмжигдэхийг намын удирдах зөвлөлийнхний түлхээсийн нөлөө л шийднэ.  Цахим хөгжил харилцаа холбооны яамны сайдаар Н.Учрал томилогдох нь дамжиггүй болсон гэх. Ямартаа ч эрх баригчид намынхан сайдын суудал мөрөөдөн санааширч сууна. Хэн нь томилогдсон ч эрх мэдэл албан тушаалыг дагаад үүрэг хариуцлага, чадвар мэдлэг дагалдах хэрэгтэйг санахад илүүдэхгүй. Боловсон хүчний нөөц нь хүрэлцэхгүй юм шиг сонголт хийж ажлын чадваргүй, амбиц хөөн, хэтэрсэн улстөржилт хийдэггүй нэгнийг томилно л гэж найдья.  Одоогоор МАН-ын фракциудын тохироо бүрдээгүй, Засгийн газрын бүтцийн өөрчлөлтийг яаравчлах нь бушуу туулай борвиндоо баастай гэдгийг үлгэр болох гээд байгаа. Төрийн гурван өндөрлөг ч нууцхан улстөрөө хийж, түнш болох хүмүүсээ тооцоолж сууна. Нэгэнт солигдох сайдууд юм бол амьдрал нь хүнд байгаа ард иргэдийнхээ өмнө тулгарсан асуудлыг шийдчих зорилготой, зоригтой, чадвартай, мэдлэгтэй нь сонгогдоосой билээ.